OHANGWENA – Ohamba yaUkwanyama, Martha Mwadinomho yaKristian yaNelumbu okwe likaleka kokule noshiningwanima shomwedi wa dja ko shetulopedu lomunashipundi welelo lopamufyuululwakalo lOukwanyama (OTA), George Nelulu. 

Eshi a popya noikundaneki pOhangwena mEtitatu, YaNelumbu okwa ti oohandimwe vonhumba vomo-OTA ova li va shangela Nelulu omukanda tawu ti okwa tulwa pedu momafiku 26 Kotomba, ve shi ninga monyowa na ine shi shiivifilwa.

Okwa ti oohandimwe ovo ova longifa oshishako shombelewa yaye okudengifa kombaapila oyo ya yandjwa pehe na eshivo laye, osho sha kala sha kana oule weemwedi. “Haame nda tula Nelulu pedu noshinima eshi osha kala itashi kofifa nge,” yaNelumbu osho a lombwela ovatoolinghundana, ye ta ti vali Nelulu okwa shunwa moilonga.
Okwa londelwa yoo kutya ava va longa oilonga i li ngaho otava ka katukilwa onghatu ngeenge ova tongololwa kutya ovo oolyelye konima yomakonaakono. 

Nelulu okwa kala Elenga linene loshikandjo Eudaneko oule weedula 18 da pita nokwa li a tulwa pedu eshi taku ti okwa yandja po ombinga yoshikondjo osho kElelo lopamufyuululwakalo lOndonga ina shikula omilandu di li mondjila.
Ta popi mEtitatu, Nelulu okwa ti okwa efa oshitopolwa osho shi ye kOndonga shaashi pakutendwa oshi li shili mOndonga. 
Ta ti monakudiwa ovaleli vomalelo aa avali (Oukwanyama nOndonga) ova li ve li puma mumwe omolwa oshipambu shedu osho. 
“Onghene onda tokola oku efa edu olo, konima eshi nda lombwela omuleli wange meekulu (Ohamba), opo tu kaleke po ombili pokati komaleleo aa avali,” Nelulu ta fatulula.
Okwa holola kutya okwa shunwa moilonga konima eshi omupresidente mukulu Hifikepunye Pohamba a ya mo moshinima omo, ta ti nomakonaakono oo a ka landula ko okwa ka holola kutya edu olo ili li shili oshitukulwa shelelo laNdonga.  –Nampa