Victoria Kaapanda

ONGWEIVA - David Nghiwilepo gwomomukunda Iikango mOngwediva ota nyenyeta kutya ehangano lyomalusheno Nored itali gwanithapo iilonga yalyo ngaashi lya gana.
“Ondi na oopala dhomalusheno oshowo iikwamashina yomalusheno ya ninga oomwedhi dha pita pundatu dha tentekwa megumbo lyandje kaanilonga yaNored. Ondi na uumbanda kutya ngele iinima mbyoka oya ka yonagulwa kaafuthi omanga yi li megumbo lyandje otaya ka pula lye,” Nghiwilepo ta nyenyeta.
Ta ti, okwa ninga oonkambadhala odhindji ta lopota koombelewa dhawo  dhOmongwediva noyokOndangwa, ihe kape na sha tashi ningwa po, kakele kokutya ewaa, iilonga otayi ya yi longwe. 
Nghiwilepo okwa li a ningi eyindilo lyolushuno omumvo gwa yi muJuni, kehangano ndyoka, nokwa li a futu  N$94 499. Ta ti okwa li ye mu uvanekele kutya iilonga mbyoka otayi kala ya tamekwa omanga oomwedhi hamano inadhi pita okuza esiku a futa iimaliwa mbyoka.
“Ondi uvite uudhigu oshoka onda futa iimaliwa ayihe ya gwana po, ngaashi ya pula, ihe sigo onena kaye na sho ya longa po, kakele kiilongitho yawo mbyoka ya tenteka megumbo landje,” omusamane ta ti ngaaka. 
Oshike ye na okuuvaneka iilonga itaye yi ningi. Ta ti oku na ombapila ya shanga kutya ngele iilonga mbyoka inayi longwa muule woomwedhi ndhoka na dhengele kombelewa, ihe nena kombelwa kaku na omayakulo gasha.
Ta hokolola kutya okwa ninga omasiku ta tondoka noombelelwa ndhoka nokudhenga oongodhi, ta pula kutya oya hulila peni niilongithomwa ya kalela egumbo lye,  ihe otaye mu henuka ashike omanga yamwe taye mu yamukula nayi. Nghiwilepo ta ti oomwedhi ndatu odhindji, ihe kape na sho tashi longwa po nenge eyamukulo lyasha.  
Ta ti iha lala a kotha oshoka oku na uumbanda iinima yaantu yi yakwe mo. “Kandi shi okukeelela iinima yawo, kandi na iimaliwa yokufuta iinima kandi shi sho ya enda,” Nghiwilepo ta popi nongeyo.
Okwa ti hugunina okwa li a dhengele  gumwe gomwaamboka ya tenteke mo iilonjgitho mbyoka. Okwa li e mu fatulile kutya kaye na uudhigu okulonga iilonga mbyoka ihe ehangano  lyolyene lyoNored inali hala oku ya futa.
Ta ti, yo ohaya pewa ashike ookontalaka ya longe iilonga e taya futwa kuNored. Ta gwedha po ta ti ngele oya futwa iimaliwa yiilonga ya longa nale, kaye na uupyakadhi okutsikla okulonga. Omupopiliko nomugandji gomawuyelele mehangano lyomalusheno lyaNored Simon Lukas kakwa li ta yamukula ongodhi ye, opo a tye ko sha kehokololo ndika.