Ehangano lyokukwata oohi mefuta lyedhina NovaNam olya landa oombautu mbali oonene oompe dhongushu yoomilliona N$320 nelalakano lyokugwedha mo oohi mofakitoli yawo ndjoka yi li moLuderitz.
Sha ikolela komushangwa gwoMinista yoohi Derek Klazen, oombauto ndhoka otadhi ka eta ompito yiilonga oshowo elunduluko nehumokomeho mondoolopa.
“Moofakitoli dhehangano lyoNovaNam omu na nale aaniilonga 1 500, moka natango tamu ka gwedhwa omolwiilonga tayi ka holoka tayi etwa koombauto ndhoka dha gwedhwa po,” ta fatulula ngaaka.
Ta ti, shoka natango otashi ka taandelitha oshimaliwa moshitopolwa moka. Oombauto ndhoka odha gwedhwa kombauto yimwe onene yehangano ndyoka, tayi ithanwa Lalandii ndjoka kwa li ya landwa momumvo 2019.
Ta popi ta ti, oyendji oye li momapandaanda omolwa onkalo yokwaa na iilonga ihe oombautu ndhoka otadhi ka gandja natango oompito dhiilonga kuyamwe.
Minista ta ti okwa li a yelithilwa kutya iimaliwa ya landa oombauto ndhoka okwa li ya zi miimaliwa oomilliona N$650, ndhoka kwa li dha gandjwa okuyambidhidha omahangano goohi moNamibia alihe.
“Oombauto ndhoka mbali oompe odha nuninwa okulonga ashike momudhingoloko gwoLuderitz, mendiki tali ithanwa “Hake fisheries sector”, ta fatulula ngaaka.
Ta ti, oombauto ndhoka otadhi ka eta wo natango elunduluko lyonkalo oshowo ekandulepo lyondjala.
Oombauto ndhoka okwa li dha ndhindhilikwa oonene oshowo oonde.
Oyendji okwa li ya gongala ya tale oshowo okukwashilipaleka oombauto ndhoka mbali.
Minista okwa ti natango shoka osha holola wo ohokwe, ehangano ndyoka lyi na noshigwana shalyo.