Ombaanga yoBank Windhoek, naMartin Nekombo, omungeshefa, ova yambidida ofikola Ashihaya Primary School neesamende dokutuningila ovanafikola eengulu dokuhongelwa.
Bank Windheok okwa yandja eesamende 65 di li pongushu yoshimaliwa N$6 500 omanga Nekomba okwa yandja eesamende 40.
Ofikola Ashihaya oi na ondodo okudja 0 fiyo ondodo onhiheyali novanafikola 175 novahongifikola vaheyali.
Omukulunhufikola pofikola Ashihaya, Iiyambo Bonifatius okwa ti ofikola yaye oya taalela eshongo linene leengulu dokulongela ovanafikola.
“Ovanafikola veendodo 5,6 nondodo onhi-7 ohava longelwa momatwali molwaashi ka pena eengulu da wana,” Bonifatius ta ti.
Okwa ti ovanafikola hava hongelwa momatwali ohava kala tava mono oixuna pefimbo lodula shaashi momatwali ohamu lokwa.
“Pefimbo loutalala ovanafikola ohava kala tava dengwa koutalala nomatwali ohaa pepwa po komhepo,” a weda po.
Okwa ti ounona vahapu ova ninga oihakanwa yokufiya po ofikola nokufaula keetundi molwaashi ovanafikola ova lulilwa konghalo ii yopofikola.
Bonifatius okwa ti ofikola yavo oya taalela yoo vali eshongo lukuhe na olusheno.
“Ovanafikola vahapu otava dengwa koluhepo shaashi ovakulunhu vavo ihava longo omanga ounona vamwe eefiye. Ovanafikola kave na omidjalo dofikola neenghaku onghee ohandi indile moshiwana opo shi yambidide ovanafikola neenghaku nomidjalofikola,” ta ti.
Okwa ti ota indile yoo vali ovanangeshafa va yooloka, ovaleli vopapolitika nomahangano opo va yambidide ofikola noitungifi molwaashi ova pumbwa oitungifi opo va dule okutameka okutunga eengulufikola.
Martin Nekomba okwa ti osha fimana ngeenge okaana taka hongelwa momudingonoko u li nawa opo ka dule okulihonga nondjungu nokupita ka ninge omunashilonga wokomongula.