Ohamba yOvakwanyama mekulu Martha Mwadinomho Kristian Nelumbu oya yambidida oshiwana shovayelele noikumbafa, oikulya noidjalomwa.
Oshiwana shovayelele okwa li yoo vali sha shivwa keumbo loUkwanyama kOmhedi opo shi ka lye omusha pamwe nohamba Olomakaya.
Oshiwana shovayelele sha dja koikandjohoololo ya yooloka moshitukulwa shaHangwena okwa li sha hafa unene okushakeneka ohamba lwoshikando shotete.
Moshipopiwa shaye ohamba Nelumbu oya ti elelo loUkwanyama ota li lalakanene okukaleka po ekwatafano liwa nombili noshiwana shovayelele.
Onghee okwa kumaida ovanhu opo va kale ve na ombili noshiwana shovayelele momikunda davo molwashi ovayelele ova kale mo efimbo lile moshitunda shaUkwanyama.
“Onda didilika oshiwana shovayelele tashi dengwa koluhepo nondjala, omanga ovayelele vamwe ina va shakenenge nale. Onghee naashi osha eta opo ndi ufane oshiwana shange tu lile pamwe omusha,” Nelumbu ta ti.
Nelumbu okwa ti oshiwana shovayelele nashi kale sha manguluka oku ka konga omakwafo kovaleli vopamufyuululwakalo noshoyo okutalela po eumbo lelo laUkwanyama shaashi navo oshiwana shaye.
Ohamba oya kumaida ovayelele va kale vena ombili, hava longife oikolwifa ihapu noshoyo oku li kaleka kokule nokulonga oimbuluma.
Omukulupe weedula 82 Shikongo Haufiku a dile kOnakalunga okwa ti okuudite etumba okushakenaka ohamba lwoshikando shotete.
“Ka kwa li ndi shishi kutya ohamba yetu olyelye. Mboli kuuhamba okuwa, iyaalo mekulu eshi wetudimbuluka kutya mboli naafye oshiwana shoye,” Haufiku ta ti.
Haufiku okwa ti ova dja nale vena ekwatafano liwa nOvakwanyama unene tuu pefimbo loita, onghee natango otava twikile okukala ve na ekwatafano liwa.
Okwa yelifa ta ti kave na oupyakadi noku ufanwa kutya vo ovakwanghala shaashi edina ovakwanghala ola dja nale nolafimana momufyuululwakalo vavo.
“Heno fyee ovakwanghala. Ovanhu nava xulife po okutu ufana oshiwana shovayelele molwashi ngaho otwa fa twa lukwa edina limwe po vali,” ta ti.
Letisia Haindula weedula 78, a dile komukunda Omulapapa okwa ti nale ka kwa li va tali kako onga oshiwana shaOvakwanyama molwashi okwa li hava ningwa okatongo.
“Onda pandula ohamba yetu yaUkwanyama eshi hetu hanganifa. Otwa manguluka paife molwashi ohamba oya ti nafye oshiwana shaye,” ta ti.
Okwa ti ova dana onghandangala ya kula mokuyambidida Ovakwanyama unene tuu ngeenge tashi ya pokupanga omikifi doshiwambo nokulonga momaumbo Ovakwanyama.
Onghee okwa ti naashi osha eta opo ekwatafano lavo li kale la kola nokukala vena elongelokumwe. – fhamalwa@nepc.com.na