New Era Newspaper

New Era Epaper
Icon Collap
...
Home / Ohanona ya ekelwahi ya adhika noonyala ndatu dha lika ko kookatali

Ohanona ya ekelwahi ya adhika noonyala ndatu dha lika ko kookatali

2022-05-13  Victoria Kaapanda

Ohanona ya ekelwahi ya adhika noonyala ndatu dha lika ko kookatali
Top of a Page

Opolisi moshitopolwa shaKhomas oyi li molukongo lwomukiintu a ekelahi ohanona tayi fekelwa yi na omasiku gontumba, konima yoshiputudhilo shopombanda shoWindhoek Vocationa Training Centre.

Ohanona ndjoka ya adhika kaayi na oonyala ndatu kadhi ko, otaku fekelwa dha lika ko koombwa.

Sha ikolela kepeko lyopolisi ohanona ndjoka okwa li yi itsuwa komulongwa gumwe gomo-WVTC omutenya gwEtiyali.

Otaku hokololwa kutya ohanona ndjoka kwa li ya adhika nomwenyo, oya valwa inaayi adha, moomwendhi heyali, ano  okapelema.

Opolisi oya ti ohanona ndjoka oya li ya falwa koshipangelo, noyi li monkalo yi li nawa.

Opolisi otayi indile moshigwana kehe ngoka e na uuyelele mpoka pe na omukiintu a li e na etegelelo ihe ke na sha ohanona kaayi shiwike mpoka yi li, a lopotele opolisi yi li popepi naye.

Opolisi yaNamibia aluhe otayi kunkilile oshigwana okupitila miikundaneki shi hulithe po oku ekelahi nokudhipaga oohanona, nuuna inaaya dhi hala ye dhi tule piitaasi yopolisi nenge miipangelo ngele ooyina kaye na ohole nadho.

Martha Shinedima omuhungimwenyo gomomikunda oomwedhi dha piti okwa li a ti, omatompelo haga gandjwa koomeme taya ekelehi  oohanona    kage na ongushu.

“Yamwe ohaya gandja omatompelo kutya, he yohanona okwa ipatana epunda, yamwe itaya vulu okuhupitha ohanona omolwoshimaliwa kaashi po, yamwe oya tila okugeelwa momagumbo,” ta hokolola.

Uupyakadhi auhe mboka kau vule uupyakadhi wonkalamwenyo yoye we yi tula moshiponga wu li konima yekumba oshowo to kala nondjo koshipala shaKalunga sigo aluhe.

“Otandi kumagidha oshigwana shi hulithe po okulonga iiningwanima ya tya ngaaka. Ino dhipaga,” ta kumagidha.

– vkaapanda@nepc.com.na


2022-05-13  Victoria Kaapanda

Share on social media
Bottom of a page