WINDHOEK – Oshigwana shomiilando osha tala unene kokugongela omaliko komukalo kehe tagu vulika no itashi yawala uuwanawa wonkalathano woshigwana ashihe, osho minista gwEmona Calle Schlettwein a ti. 

Schlettwein ndhino okwe dhi popi sho a li a tambula ko epapa ndyoka hali pewa aawiliki mboka ya longo pauyuuki lyoTransparency Excellence Award okuza kehangano lyoAfrican Leadership Magazine UK sha ningilwa moWashington DC Etitano lya zi ko. Uuyelele mbuka owa gandjwa Osoondaha ya zi ko sho montumwafo yokiikundaneki moka Schlettwein a dhimbulukitha aaleshi kutya okulunga itapula oku li kehe mpoka pe na eliko. 

“[Okulunga itapula] otaku kwata moshipala ehumokomeho lyuuwananwa woshigwana, tashi kutha ko oshipambu sheliko ndyoka andola lyi na okutopolelathanwa koshigwana –tashi ningwa shaa li paveta, nomokuninga ngawo, oluhepo moshigwana otalu tsikile nokukoka,” ta ti.
Schlettwein ta ti oshigwana sha manguluka komukalo gwokudhengela ondhi peho itashi vulu oku ikundwa, ngele itaku ikundwa tango ongushu ya sho.  

“Onkalo yomiilando ompe, oya ulike eshunopevi mongushu yomaiyuvo gopankalathano. Ongushu yopankalathano oyi li ya taalelwa kuupyakadhi notashi vulika yi ka pingenwe po kohole yomaliko nuufukulume,” ta ti ngano ye ta gwedha po kutya oshigwana ngashingeyi osha manenwa po ethimbo koku ilikolela iimaliwa komukalo kehe tagu vulika. 

Ominista tayi tsikile okuyelitha nkene epangelo lyokatongotongo lya thigile Namibia uuthiga wokulunga itapula. Epangelo lyuukololi olya li lya si oshimpwiyu kutya omaliko koshigwana oga li gi ikalekelwa opo ga ninge giilumbu owala nomashina gepangelo oga li ga longithwa moshinima muka. Konima sho twi imangulula kuupika mbuka natango otatu tsikile okumona uulingilingi tawu tsikile muungundu waamboka yiigongela onga oohandimwe moNamibia.  

Nonando onkalo ya yatya ngawo, inatu pumbwa oku teka omukumo, oshoka iita okulwitha oluhepo oyo natango i li emanya lyokolonela lyokulwitha okwaathikepamwe moNamibia. Opo ku lwithwe onkalo yokulunga itapula, ooveta dhoshilongo odha pumbwa okulundululwa opo shika shi kale oshitopolwa shokulwitha uulingilingi moshilongo. “Ooveta ndhika nadhi kale odho tadhi landulwa, okuza owala pomakonaakono sigo oompoka omufekelwa muulingilingi taka monika ondjo. Oongenge dhoveta nadhi pewe omayego, ano nadhi nkondopekwe,” ta gwedha ko.  
Oshifo shoka oshilile po oku eta puuyelele aaleli aawanawa Aafrica opo ya monikwe kuuyuni, wo uuyuni wu uve ehokololo lyaAfrica okuzilila kaaleli muuyuni awuhe. 
(NAMPA)