ONGWEDIVA - Ovalandifi voikulya yOshiwambo noihongomwa komaulikilo oipindi Angwediva otava nyenyeta tava ti eengeshefa davo otadi ende nakashona molwaashi ihava mono ovalandi va wana.

Pefimbo Kundana a talela po omaukilo oipindi ova hokolola tava ti ova futa muni oshimaliwa shonhele opo tava landifile ashike kape na ovalandi.

Otava indile elelo lodoolopa yaNgwediva opo li kale tali ningi omaulikilo oipindi kexulilo lomwedi fiyo oshivike shotete shomwedi mupe.

Omukulupe Leena David a dile komukunda Elyambala ta landifa oihongomwa yOshiwambo ngaashi omatiti, oimbale noshoyo omavanda nombidi, okwa ti neudo omaulikilo okomudo Angwediva okwa lunduluka shaashi kamu na vali ovalandi ngaashi a kala shito nale.

“Onda futa oshimaliwa N$500 yonhele yokulandifila ashike efiku ohali dulu okupita po inandi landifa sha. Onghee hasho kwa li nda teelela omaulikilo oipindi a kale ngaha,” David ta hokolola.

Ndinelao Shaalukeni a dja mOngwediva ta landifa oikulya yOshiwambo ngaashi omingome, omalodu oilya, eenyandi nosho tuu oilandifomwa ya yooloka, okwa weda po ta ti oikulya yavo ohai ningi nayi molwaashi ihai landwa.

“Ngeenge oshikulya sha telekwa sha ninga omafiku mahapu inashi pumbwa vali okulandifwa. Onghee ihatu kala tu udite ombili ngeenge oikulya yetu inai landwa,” ta ti. Okwa weda po yoo vali ta ti okwa li ve na omukumo kutya neudo otava longo oshimaliwa shihapu ashike paife ova sholola molwaashi ovalandi kave po.

Omaulikilo oipindi Angwediva oku na ovanangeshefa 418 mwa kwatelwa ovanhu va dja kondje yoshilongo notaa xulu mongula mOlomakaya.

fhamalwa@nepc.com.na