Opolifi moshitukulwa shaKhomas otai konakona oshibofa shekwatonghonga, omo omulumenhu weedula 20 ou vati a mitika okakadona keedula 13 oko va kala nako mekwatafano lopaihole.

Oshiningwanima eshi osha ningilwa molukanda Wanaheda moWindhoek.

Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omufekelwa okwa kala ve li mekwatafano lopaiohole nokakadona oko okudja ketameko lomudo ou. Opolifi oya ti novadali vavo ova kala ve shishi kutya ove li kwatafano lopaihole onghee ovadali vati ova kala ve shi tambula ko no nande okaana kavo ke na eedula ina di fika. Ina yokaana oko ke na eteelelo okwa hokolola ta ti ova dimbulula neudo muFebruali kutya okaana kaye oke li mekwatafano lopaihole nomufekelwa oo nova ninga onghendabala yokuvatopola opo va xulife po ekwatafano olo, ashike mboli omufekelwa okwa twikila oku ya moixulo nokaana. “Onda ka mona eike eshi edimo laye ta li ende ta li kulu nolutu laye ta li lunduluka. 

Okudja opo onde mu pula fiyo ta lombwele nge kutya oku na eteelelo lomufekelwa oo va kala naye,” ina yokaana ta hokolola.

Omukainhu ou okwa shivifila xe yokaana oo a ka patulula oshibofa.

Xe yokaana okwa lombwela Kundana ti okwa kumifwa uda nai koshinima eshi. Ta ti okaana kaye okaninini, ke li mondodo onhi-8.

“Onda uda nai. Okaana kange okashona, ko oka hangika opo ta ke li hongo nawa ndele paife elihongo la ko ola iwa moshipala,” ta hokolola.

Okwa ti okwa patulula oshibofa shaashi okwa hala omulumenhu oo a kale a a kwatwa po diva shaashi okwa longo oshimbuluma shekwatonghonga eshi aya moixulo nokaana kaye.

Okwa weda po ta ti ota vele ombedi ina yokaana ou a kala eshi shi kutya okaana oke li mekwatafano lopaihole nomulumenhu oo ashike okwa kala a mwena.

“Ame ihandi di meumbo limwe navo onghee ngeno okwali ndi shishi kutya omulumenhu ou hai moixulo nokaana kange ngeno onde mu lopota nale kopolifi,” ta ti.

Eshi a kwatafana naKundana minista woukashike kookanhu nonghalo nawa yokaana Doreen Sioka okwa ti omulumenhu ou vati a mitika okaana oko na kale a kwatwa po diva shaashi okwa longa oshimbuluma shekwatonghonga eshi a ya moixulo nokaana ke na eedula ina di fika.

“Ovadali vokaana ova ninga epuko la kula eshi va kala ve shishi kutya okaana kavo ke li mekwatafano lopaihole nomufekelwa oo ashike ova kala va mwene. 

Ovadali okwa li va wana okulopotela opolifi kutya ope na omulumenhu tai moixulo nokaana kavo,” Sioka ta ti. Okwa ti kape na omulumenhue e na oufemba wokukala aya moxulo nounona va shona onghee ku keshe ou teshi ningi ota kala a kwatwa po diva.

“Paife omulumenhu ou okwa ya onghalamwenyo yokaana moshipala shaashi ita ka dulu vali oku li honga nelitulemo,” minista ta ti.

Okwa kunghilila ovadali opo va xulife po okukala tava e fa ovalumenhu tava i moixulo nounona vavo shaashi eshi oshi li omahepeko omomaumbo. “Ounona nava kale ve li metonatelo la wana. Ka pena omudali e na oufemba wokuyandja po okaana kaye ka kale mekwatafano lopaihole nomulumenhu wonhumba,” Sioka ta ti.

Okwa weda po ta ti ovalumenhu ve li mekwatafano lopaihole nounona va shona nava lopotwe keembelewa doukashike kookanhu nonghalo nawa yokaana.

Vati okaana oko ke li eetelelo leemwedi hamano paife ashike otaka twikile nokuya kofikola.

fhmalwa@nepc.com.na