ONGWEDIVA – Omivalu dopamalungula oda didilika kutya okanona kokakadona ohaka dulu okukala inaka ya kofikola omafiku atatu ile atano momwedi molwomafimbo.
Eshi vati ohashi etifa omwaalu wovanafikola vahapu, vaha ye komesho, omo mwa kwatelwa ovakainhu vaha pondole sha monghalamwenyo shaashi ohava kanifa shihapu mokufaula.
Okwa didilikwa yoo omwaalu wovalumenhu vahapu hava i komesho meenghatu dimwe ve dule oukadona.
Omupeduminista woshikondo shouhaku noukalinawa Ester Muinjague, okwa popya kutya omafimbo okwa kala lela oshiimbi shakula meenghalamwenyo doukadona vahapu molwomashongo oo ha eya nao.
Oikwafifo nayo natango ohai kala lela omukundu koukadona vahapu shaaashi haaveshe hava dulu okulilandela oikwafifo ei. Eshi okwe shi popya pefimbo a li ta yandje oututa kounona vofikola ya-PH Mwandingi JSS mEenhana moshitukulwa shaHangwena.
Muinjangue okwa weda po yoo kutya oundjuwo ovo hava kala keefikola inaa nyika lela oukoshoki, navo ove na oudjuu wokulongifwa kounona voukadona unene tuu ngee veli komafimbo.
Ta ti eefikola nadi tameke okukala di na oundjuwo tava longo nawa nova filwa oshisho efimbo alishe opo va kale hava longifwa koukadona pefimbo tava wapaleke. Peefikola opa pumbwa yoo okukala pe na omeva okulikosha opo oukadona va dule okukala have likosho pefimbo tava wapaleke.
“Omukalo wa tya ngaha, ota u eta yoo ounona ava va kale hava kala kofikola efimbo lile tava wanifa po oilonga yavo yofikola,” Muinjague ta ti.
Ounona voukadona ohava taalele omashongo ahapu lela unene tuu ngeenge ve li komafimbo mosikola.
Omashongo ongaashi okukala ina manguluka pefimbo leetundi.
Okweenda a manguluka ngeenge e li komafimbo shaashi olushindo okudilila kounona voumati nalo ohali kala lihapu lela.
Okukala vehe na oikwafifo ya wana natango ohashi kala eshongo lakula, shaashi omunhu e li monghalo ya tya ngaho oha pumbwa omunhu e lifila oshisho kolutu.
Gift Mulunga, omunambelawa wokehangano lo-UNFP okwa tumbula kutya ounona voukadona ova pumbwa lela evatelo, oshoyo ehongo la wana kombinga yoshingwanima sholudi eli.