Okanona kokamati komimvo hamano okasi, omanga yakwao yaali ya ehamekwa sho omulumentu anuwa ali e li kohi yomalomvu a yaka otuwa paandjawo, e ta hingi sigo omomuhandjo gwosikola yaanona. 

Omugandji gomauyelele gopolisi moshitopolwa shaShana Thomas Aiyambo okwa ti, oshiningwanima osha holoka moshanga sho mutenya, Etiyali molukanda Omahenene mOshakati. Otaku hokololwa kutya omulumentu gwomimvo 31 anuwa ihaa uvu ko omakutsi, a li a yaka paandjawo ohauto yoLandcruiser paandjawo, ndyoka ya li ya ningi ethimbo inaayi longithwa.

“Omulumentu ngoka ali e li kohi yiikolitha, okwa matuka po konima yoshiningwanima, ihe okwali a mangwa mbala, aadhika molukanda Uupindi,” ta ti ngaaka.

Aiyambo okwa hokolola ta ti, omulumentu ngoka, okwali a nyengwa okupangela ohauto oku ya mondalaye, oshoka okwali tahingilile noonkondo.

“Ohauto oya nuka ko kopate e ta yi pitula po okanona hoka komimvo hamano, kwali taka ende okuza mokinda, tayi tsikile sigo omosikola ndyoka tayi ithanwa Deppy kinder garden, molukanda Omahenene, yina ohofa yiipeleki. Meni lyosikola oya ehameke mo natango aanona yaali, gumwe okuna omimvo ndatu omanga omukwawo e na omimvo ne,” Aiyambo ta  popi ngaaka.

Ta ti, aanona mboka oya li yaadhika taya dhana nayakwawo momuhandjo gwosikola, pethimbo lyoshiningwanima, ashike elago enene aanona mosikola oyendji oya adhika ya zimbuka nale, noya za po pehalandjandja lyoku dhanena.

Ta ti mboka ya mono iiponga oyali ya falwa koshipangelo shaShakati mendeelelo.

“Omulumentu ngoka okwali a yi ontuku, ashike okwa landulwa sigo a monika, nokwa mangwa po kopolisi,” Aiyambo ta ti ngaaka.

Aiyambo ta ti, ongandjo yosikola oya halakana po thilu.Omulumentu nguka ota holoka nena mompangu yaShakati.Aakwanezimo ya nakusa oya tseyithilwa.

– vkaapanda@nepc.com.na