Victoria  Kaapanda

ONGWEDIVA - Aanafalama oyendji miitopolwa yonooli oya thigwa pomutenya kokapuka hoka ki iteyele momapya gawo iiwike iyali ya piti.
Mwene gwOmukunda Iihanguti moshikandjohogololo shaElim moshitopolwa shaMusati Festus Gabriel okwa ti okapuka oka lya iilya shinyanyaleka.
Ta ti okwa li a longo epya lye kuyele, nelalakano a mone iilya iiwananwa ngele omvula ya loko nawa, ihe nani kasha ivule iilya oye ya ashike yi kokotwe po kokapuka.
“Epya lyandje ngaashi wu li wete ngaaka, onda li nde li lima lya pwako thilu. Tandi li kunu ombuto ombwaanawa  lela nolya menene nawa, ashike ombaadhilila omwiiteyele okapuka haka nokulya po iilya yandje ayihe thiluthilu ngaashi wu shi wete ngawo,” Gabriel ta popi neyeme ngaaka.
Ta gwedha po ta ti okwa li  e na omukumo kutya nuumvo otamu zi iilya iihwepo tayi vulu okupungulwa, ihe  nani hasho ya thikile momakana gokapuka.
Gabriel ndhoka okwe dhi lombwele Kundana Etiyali sho a li a ka tala nokukwashiilipaleka nkene okapuka ka lya omapya gamwepo. Mwene gwomukunda okwa ti okwa lopotelwa omapya ogendji ga mona iihuna kokapuka momukunda gwe. Ashike nena sho a li a yi mepya ee ta ningi omapekaapeko momukunda okwa ti, oke li mo ngaa taka yalulwa, mbela oka hita nale mevi oshoka oka li okendji lela.
Petrus Junias nomukulukadhi gwe Soini Simon mboka ya li ya piti ongula yEtiyali taya longo mepya oya ti okapuka okayonagulapo epya lyawo thiluthilu, taya ti itamu vulu nokuza nando olata yimwe yiilya, onkene oye na okupulula nokukunununa epya lyawo natango .
Junias okwa ti  okapuka hako oshikando shako shotango taka ponokele epya lyawo.
Okapuka oka kala mo oshiwike shimwe mepya lyawo ihe uunambo kaye shi kutya oka yi peni taya ti mbela oka hita mevi oshoka kamu na nando okamwe kamwe mepya lyawo.
“Okapuka sho ka li ke tu lulile okwa li twa ningi onkambadhala yokutha omukanka kooha dhepya alihe, opo ngele ka hala okupita ke ye mepya okuza miihwa, otaka gwile momukanka. Ashike nonande omukanka gwa kwathele ngaa wumwe wu gwile mo, ethimbo ndyoka okwa li wa ponekela nale epya.
Simon okwa ti okapuka oka li ka mana ko epya lyawo, sigo Simon ta iteke okulima, ta gongele ashike okapuka, ta ti pamwe tawu pu mo ihe inashi kwatha sha.
“Okapuka oka li ke tu lulila noonkondo, oke tu thiga peke. Out na okupululula oshoka iilya oya lika ya pwa po. Okapuka oko ka li lela ihe okahanagula po omapya ogendji. Sho kwa li twa dhenge oongodhi pomikunda dhopuushinda, nayo oya ti okapuka oko ke li kuyo, “ Simon ta ti ngaaka.
Kundana sho a li a tala omapya ngoka ga li ga ponokelwa kokapuka hoka taka popiwa, ko taka nyenyetwa kaanafalama okahanagulapo iilya momapya lela.