New Era Newspaper

Icon Collap
...
Home / Omainyengo giimuna ga pitikwa

Omainyengo giimuna ga pitikwa

2021-04-26  Victoria Kaapanda

Omainyengo giimuna ga pitikwa
Top of a Page

Uuministeli wuunamapya nuunimuna, omeya nomaluhwa  owa gandja uuthemba kaatseli yiimuna ya tsikile noongeshefa dhawo.

Shoka osha li sha tulwa miilonga okuza momasiku 20 gaApilili nuumvo. Omukuluntundohotola gwiimuna Albertina Shilongo okwa ti, sha ikwatelela komulandu gwo “Namibia Foot and mouth disease”, omasiku 90 oge na okuhula inaaku lopotwa oshipotha nando oshimwe miitopolwa  ayihe ya indikwa.

“Oshipotha shahugunina osha li sha lopotwa momasiku 20 gaJanuali nuumvo, okuza tango omukithi ngoka gwa li gwa lopotwa momasiku 28 gaSeptemba omumvo gwa yi koshitopolwa shaKavango shokuuzilo, nogwa li gwa taandele koKavango gwokuuninginino, Ohangwena, Oshikoto sigo Oshana,” ta ti ngaaka.

Omukithi ngoka ogwa li gwa kondolola  miitopolwa ayihe ya li ya ya lopotwa omukithi ngoka sho kwa li kwa indikwa einyengo lyiimuna oshowo oku yi tuntila.

“Onkalo yomukithi gwekondo nelaka oya tothwa mo ya kondololwa nawa.  Okuza mpoka kakwa li we kwa lopotwa oshipotha shomukithi ngoka,” ta popi ngaaka. “Aanafaalama okwa li wo ya kambadhala okukondolola omukithi ngoka gu taandele sho taya fala iimuna yawo yi ka tuntilwe mbala,” ta ti ngaaka. Shilongo okwa kumagidha oshigwana shi lopote mbala uuna sha mono omukithi ngoka gwa ponokele momidhingoloko dhawo natango, okukaleka po iimuna yawo kaayi se.

Hugunina Shilongo okwa pandula kelongelo kumwe lyaakwashigwana nuuministeli sho ya kala taya iyutha koompango dha tulwa po kuuministeli opo omukithi ngoka kaagu taandele.    

 Klaudia Shavuka okwa ti, oya ningi ethimbo ye li muupyakadhi, nonando aalandithi yamwe oya li ya sholola.

“Otwa ningi oomwedhi ine, tu li muupyakadhi oshoka kape na onyama tu landithe naandhoka kwa li hadhi zi kuushimba okwa li dhi na ondilo itatu dhi vulu,” a popi ngaaka.

Ta ti, oya pandula oshoka otaya tsikile nomalandithilo gawo, noya inekela kutya oondando odha tulwa pevi paife.


2021-04-26  Victoria Kaapanda

Share on social media
Bottom of a page