Omutoolinkundana 

ONGWEDIVA – Sha landula eigidho lyOminista yUuyuki Sakues Shanghala, omalenga omakulu gaNdongaa otaga ka tala ko iilongithomwa yomompangu yopamuthigululwakalo kombelewa onkulu kOluno opo ga tameke okulonga ngaashi sha uthwa kepangelo. 
Kakele kaashoka epangelo olya kutha ko iiyenditho kombelewa ndjono onkulu, ndjoka ya li ya pewa nakusa Omukwaniilwa Immanuel Kauluma Elifas.
Oshiwike shika minista Shanghala okwa ningi eigidho kutya omalenga ngonga ga taambwa ko kepangelo onga aapanguli yopamithigululwakalo oga pumbwa okutameka iilonga oshoka iipotha oya ningila ompangulilo yaMangestalata oyindji, omanga yimwe yomuyo ya li tayi vulu okupotokononwa pamuthigululwakalo. 
Shanghala ta ti aapanguli mbaka yopamuthigululwakalo oya pumbwa okukutha iilongitho mbyoka yali pewa kepangelo yo ya tameke iilonga yawo. 
Limwe lomomalenga omanene gaNakusa Omukwaniilwa Elifas, Kashona kaMalulu okwa ti iilongithomwa ngaashi iipundi niitaafula otayi ka tumbwa ko kombelewa onkulu yoshilongo kOluno nokufalwa kOnethindi hoka paife oko taku longelwa komalenga ngoka ogo ga tambulwa ko kepangelo.
Kakele kookompiuta niitaafula, iihauto mbyoka ya li ya gandjwa kelelo lyOndonga pethimbo sho omukwaniilwa Elifas a li e na omwenyo nayo oya kuthwa ko kepangelo. Iihauto mbika iyali oya li ya gadjelwa oshipundi shuukwaniilwa nashikwao osha li sha gandjwa molwa uunashipundi womalelo gopamuthigululwkalo. 
Malulu ta ti omalenga (ngoka ogo geli momambo gepangelo) ngashingeyi otaga longele kombelewa kOnethindi hoka nako geli ko ga uthilwa ko koshigwana. 
Ta ti ombelewa ndjoka ya kala pOluno nayo ombelewa yoshigwana nelelo lyOndonga kali na mo sha nando ometungo ndjoka.
“Ndjoka ombelewa ya tungwa niimaliwa yoshigwana noshigwana osho sha li sha tula mo omukwaniilwa mombelewa moka. Oshafaathana owala nombelewa yokOnethindi, nako omalenga ogeli ko ga tulwa ko koshiwagwana,” Malulu ta ti.
Kakele kompangulilo yopamuthigululwakalo ndjoka tayi tameke, Malulu okwa ti oshigwana shaNdonga osha hala wo oshikumungu shaakwaniilwa yaali ya ulikwa mOndonga sha potokonoka. Mokupotokonona oshikumungu shika, oshigwana osha hiya minista e lile po omalelo gopamuthigululwakalo Peya Mushelenga opo e ye a pulakene omaiyuvo nomahalo gAandonga ngula. Mboka ya tengelelwa koshigongi tashi ka kala kOndangwa Trade Fair oya kwatela mo Gavena gwaHangwena Usko Nghaamwa, Gavena gwaShikoto Henok Kankoshi noshowo Gavena gwaShana Elia Irimary. Oogavena adhihe ndhoka ndatu miitukulwa yadho omuna iitukulwa yelelo lyOndonga.  “Oshitsa shopokati shimwe, ano oshinima shaakwaniilwa ya ulikwa yaali mOndonga,” Malulu ta yelitha.  Ashike Elengenene lyoshikandjo shaNiimwandi Naeman Amalwa okwa ti ye nomalenga ngoka geli kombinga yomuulikwa Konis Kalenga, go ina ga mona ehiyo lyoshigongi shangula. Ta ti ye okushi owala kutya okwa ningwa  eindilo opo Kalenga a tambulwe ko papangelo onga omukwaniilwa na okwateelelwa eyamukulo kombelewa yaminista Mushelenga.  Ta ti ombelewa yawo ina yi mona sha sha za kombelewa yaShanghala yi na sha nompangu yopamuthigululwakalo.