Lasarus Hakwaake
Okongo – Omukundadoolopa Okongo opo wa etwa koshivalo sheedolopa okudja muNovember 2015, wa ninga odoolopa onhinhatu moshitukulwa Ohangwena. Ngaashi naana shi li nena omukalondjikilile moilando, odoolopa Okongo oya faneka noneudo opo i ka ninge omauliko oipindi omativali oo a shivika nawa nedina “Oshitufi shOmaludi”. Omaludi oo onghedi yovanamapya novainamuna oku eta eengobe pamwe noku ludika opo va pandule yoo ovanahambo ovo va panga mofuka tava vingile eenghwandabi
Omunambelewa omukulunhu wodoolopa Okongo Wodibo Haulofu okwe tu kufila ko kutya noneumdo ombwano okoluvanda ngoo ngaashi sha fanekwa. Odoolopa oya faneka kutya oshitufi shomaludi osho shi li yo omhito yeuliko loipindi yopamufyuululwakalo oko tashi ka kala. Elalakano loshitufi eshi okukulika eliko lodoolopa oshoyo okukulika omangeshefelo paku ulika noku landifa oshoyo okuyandja omayakulo okudja keembelewa oshoyo omahangano omoshilongo ashishe.
Wodibo ota ti shoneudo osha denga mbada, omalongekido oku li metifa, onhele oya longekidika nawa. Outala vokuulika oipindi ova longekidwa, okudja ngoo koutala veendja tadi tokola elaka, oikunwa yOshiwambo nomidjalo domifyululwakalo ito mane, efiku olo kape na oxuxwa itai ka tondoka ihe na ehandja. Oshiningwanima tashi ka kala ko sha kula osho oshidano sheengobe osho tashi ka ulika eengobe odo da lifikikika noda ondoka nokeembinga. Eshi osho oshikando oshitivali eshi mondabo tamu ka shunwa natango konima eshi ovanahambo vodula ya dja ko kwa li va mangwa nokomatwi kuFillipus Nghuti a shivika nawa Shipila, okamati ohaka lifa eehove ndele to hale u tye pamwe oda fudilwa. Onhele oya pwa okulongekida novaludiki veehove ova teelelwa ve lishangife opo va uye va ludike eehove, kape na umwe a patelwa pondje, keshe ou e shi kutya okwa lifa sha wana ne uye e limonene ekopi laye.
Ovanafaalama otava ka mona omhito yokufandifa po eengobe davo oshoyo oilikolomwa yomomapya nokutukulilafana omauyelele ounamapya nounaimuna, omhito yokuliyaombadwa nokutanga eengobe nayo opo tai ka kala. Otaku ka yandjwa omauyelele ahapu okupitila movapopi vonawa nomalongo ounapapya nounaimuna a nuninwa ovanafaalama.
Oinyangadalwa imwe ya fimana tai ka kala ko ongaashi, efiyafano lokakadona dingi, omaudono a yoolokafana omalihafifo keenghulungu deengalo dovaNamibia tashi ka ningwa efimbo nefimbo.
Wodibo okwa popya kutya Omaludi okwa fanekwa a ka ningwe okudja momafiku 25 May fiyo 01 June 2019 pokapale kakulu keedila mOkongo. Omupresidente woshilongo Hage Geingob oye ta ka kala omweenda a fimana koshidano eshi sheengobe.