Omanashipundi welelo laUkwanyana Eliaser Waandja okwa ti oovene vomikunda nava xulife po okulandifa omadu kondado yopombada noshoyo okukala tava longifa oulingilingi nokupewa ombubo.
Waandja okwa ti edu pamufyuululwakalo oli na N$600 ile omunhu a yandje ongobe kumwene womukunda onghee okwa ti ka shili mondjila ngeenge oovene vomikunda tava kengelele okulandifa omadu kondado ya pitilila.
Ovakwashiwana vamwe ova lombwela Kundana tava nyenyeta eshi hava kala tava futifwa oshimaliwa shihapu koovene vomikunda ngeenge tava lande omadu.
Ovakwashiwana ova hokolola tava ti oha pulwa va fute N$2000 ile N$1500 koovene vomikunda ngeenge tava lande edu onghee ove udite kutya oovene vomikunda vopaife otava longifa oulingilingi.
Omukwashiwana umwe okwa weda po ta ti okwa nyenwa ombapila kumwene womukunda yokutula epya laye kedina laye shaashi ina hala okufuta N$1700 oyo tai pulwa kumwene womukunda a fute.
Pefimbo Waandja a ninga eenghundafana naKundana okwa hokolola ta ti ka shili mondjila oshiwana tashi landifwa edu kondado yopombada shaashi elelo laUkwanyama ina li yandje epitikilo koovene vomikunda va kale tava pewa oshimaliwa shombumbo ngeenge va yandja edu kovanhu kohadimwe.
“Ovanhu aveshe nava yandje ashike N$600 koovene vomikunda ngeenge va pewa omadu ndele havanhu tava nyenwa edu shaashi vehe na oshimaliwa shihapu,” Waandja ta ti.
Okwa weda ta ti oshiwana nasho nashi xulife po okukala tashi li landifa omadu kondado yopombada shaashi eshi otashi eta eenamanana pokati kovakwashiwana ngeenge pena umwe ina futa oshimaliwa sha mukwao pefimbo.
Waandja kwa ti ombelewa yaye oya didilika ovanhu ve hole okulikufila omadu ina va pewa onghee okwa ti eshi oha shi eta ovanhu vahapu va kale va ka nyenyete mongula ngeenge tava tewa po ponhele opo shaashi ka kwali va pewa po.
“Ovanhu nava kale ve na omakwatafano mawa noovene vomikunda davo, oovene vomikunda nava yandje omayakulo kovanamikunda vavo nokukala ve na ombili,” Waandja ta ti.
Okwa kumaida yoo vali ovanhu ava ve hole okupata eendjila domomikunda opo shi kale sha mona exulilo diva.
“Ngeenge ponhele opena ondjila ya kale hai endwa kovanhu shito efimbo lile ina i pumbwa okukala ya pwatwa shaashi ovanhu vopomudingonoko opo ovai ka okulongifa ondjila oyo,” Waandja ta ti.
Okwa weda po ta ti oshiwana ngeenge sha landifwa omadu nashi kale shina eembipila dayela opo di kale oumbangi womongula ngeenge pa holoka sha shii.
Eshi a kwatafana naKundana na hamushanga welelo lOndonga Fransa Enkali naye okwa ti oovene vomikunda tava longifa oulingilingi nava lopotwe diva opo va dule okukatukilwa onghatu.
“Elelo laNdonga nalo ita li popile oveleli vopamufyuululwakalo tava longifa oungilingilingi wokulandifa omadu kondado yopombada,” Enkali ta ti.fhamalwa@nepc.com.na