Olutu lwOngwediva Annual Trade Fair (OATF) koshi yelelo lyondoolopa yaNgwediva, olwa gandja omapapa komahangano nokaantu oohandimwe mboka lya tala kutya oya dhana onkandangala muukalipo womauliko giipindi gokomumvo.
Uusiku wEtitatu, okupendukila lyahugunina, elelo okwa li lya gandja omapapa ge vulithe po140 kwaamboka ya dhana onkandangala momukokomoko okuza sho omauliko gopaipindi ga patulula omiyelo galyo tango tango omimvo omilongo mbali dha ka pita.
Yamwe yomwaamboka ya mono omapapa Ominista yOmayambulepo gOondoolopa niitopolwa yOkuushayi Erastus Uutoni, ngoka a li mayola gwondoolopa pethimbo omauliko ngoka ga tameke. Ondjodhi yaUutoni okuya po no-OATF yotangotango, anuwa oyali ya shekwa koyendji, oshoka kakwa li ya tala kutya elelo lyaNgwediva onali ke ye po nomauliko ge li pomuthika mpoka ge li nena.
NEPC, oku pitila moshifokundaneki shoNew Era naKundana naye okwa li shimwe shomwaamboka ya mono omapapa opamwe niikundaneki iikwawo ngaashi oNamibian Sun, Nampa no-NBC.
Nomahangano ngaashi MTC, FNB, Standard bank, Oshakati Premier Electric nogedjigendji, oga li ga mono omapapa.
Omauliko giipindi ngoka kwa li ga tameke oshiwike sha zi ko mEtine oga hulu ohela, naayihe oya enda ngaashi ya li ya longekidhwa.
Omupopiliko gwelelo lyondoolopa lyOngwediva Jackson Muma ota ti, omauliko oge endele nawa lela.
Muma okwa li a tumbula kutya omauliko ngaka oga li ga nana aanangeshefa nomahangano ogendji ga zi meni nokondje yoshilongo. “Aapindiki yoondondo dha yooloka moshigwana, mboka ya li ya kutha ompito momauliko giipindi oya li ya pita pomwaalu 400. Ayehe oya li ya nyanyukilwa ompito ndjika,” ta ti ngaaka.
Nonando omauliko giipindi ngoka okwa li ga kalekwa omimvo mbali omolwa omukithi gocorona, aantu okwa li ya ulike omukumo oshowo ohokwe yooshiindingili shika sho sha patululwa.
Muma okwa ti, nonando aalandithi yamwe okwa li taya ningi omayindilo opo omauliko giipindi ga gwedhelwe omasiku, inashi vulika omolwomayimbo ge li po.
Omauliko ngaka gonuumvo oga li ge egululwa pambelewa komupevipresidente gwoshilongo, Nangolo Mbumba ngoka a li e shi ningi peha lyomupresidente Hage Geingob, momasiku 28 gaAguste.
Mbumba okwa li a kumagidha mboka haya longekidha omauliko giipindi ya kale haya longele kumwe nepangelo oshowo omahangano omanene okutseyithila nokuhiya aanangeshefa kondje yiilonga ya kuthe ombinga.
“Pamukalo ngoka otaya humitha eliko moshilongo, oshowo miitopolwa nomondoolopa ndhawo. Iinyangandhalwa mbika oyasimana moshilongo, onkene oyina okukala tayi xwaxwamekwa, okugalula eliko moshilongo,” ta ti ngaaka.
Ta ti, onkalo yoshimaliwa oya kala ya nyayipala unene omimvo mbali ndha piti, nelalakano oku galula eliko moshilongo.
Ta gwedha po kutya okuna omukumo, nethano ota li ulike kutya oshilongo oshi li pokuzamo monkalo moka ya kala ya nyayika, sha ashike tashi tsikile okulonga nuundhinini.
Omauliko giipindi mOngwediva oga tamekele konima yoomvula 20 ngashingeyi noga kala taga pula komeho omumvo kehe, ka kele komimvo mbali ndhoka kwa li ga kalekwa.
Kehe omvula aalandithi naauliki yiipindi ya yooloka oya kala nokuya yu ulike iilandithomwa nomayakulo gawo momauliko muka.
Muma ta tsikile kutya nonando pokuma pwa gongala aantu oyendji ihapu kala pwaa na omaipumo mumwe, okwa tumbula kutya omauliko giipindi gaNgwediva nuumvo kaga li nando nuupyakadhi washa.
Okwa gwedha po wo ta ti, oshigwana osha gandjele lela elongelokumwe lyasho.
Iimbuluma wo nayo kaya li po, onkene elelo lyaNgwediva olya pandula aakwashigwana ayehe molwe yihumbato lyawo lyonawa.
“Ina tu tsakaneka nando uupyakadhi washa nenge iimbuluma.
Aakwashigwana ayehe oyi ihumbata lela nawa. Opolisi ndjoka ya li po inayi tu tseyithila nando oshiningwanima sha sha oshiwinayi. Aakwashigwana ayehe oyi ihumbata nawa lela,” ta gwedha po ngaaka. Omauliko giipindi ngaka okwa tegelelwa ishewe ga tsikile omumvo tagu ya pethimbo lya faathana pendiki tuu ndyoka lyomaulikilo giipindi.
-vkaapanda@nepc.com.na