Lasarus Hakwaake

EEMBAXU – Erickson Ndawanifa, mmunashipundi woshitukulwa Ohangwena okwa yandja oilongifo keekinda moikandjohoololo aishe mOhangwena. Oilongifo oya yandjwa keekinda 28 noi na ongushu yoN$234,728. 

Okinda keshe oya pewa oupundi vounona 24, oitaafula younona ihamano, oshitaafula noshipundi shomulongi, oupakete vavali veemya ditoka, oupakete vavali veemya domaluvala, noshipelende shimwe. Erickson Ndawanifa okwa lombwela oonakupewa oilongifo kutya oilongifo ei tava pewa otai kala omaliko epangelo noi na okushangelwa momambo epangelo. Okwa indila aveshe ava va pewa oilongifo ei ve i kwate noukeka, na i kale ya tuvikilwa nawa, ina i kana, ei ya kana na i lopotwe yo oi na okuningilwa omavalulo keshe odula, osho Erickson a ti. 

Okwa indila yoo ovalongi opo va longe noudiinini pakupyokola ou na. Erickson okwa indila yo ovadali opo va yambidide ovalongi veekinda, pakupashukila ovalongi veekinda pakufuta pefimbo ovalongi veekinda.

Auli Ilon Angula oye a popya ponhele yovalongi veekinda, okwa pendula epangelo eshi ta li twikile noku yambidida eekinda moshitukulwa, nokwa indila opo natango epangelo li twikile noku yambidida eekinda odo inadi mona omwafo fiyo opaife. Okwa longifa yoo omhito ei okupopya kutya ovalongi veekinda otava mono oixuna. Ovalongi ava hava futwa kovadali, omafimbo nomafimbo ovadali itava futu pefimbo, omanga ava hava futwa okudja kOuministeli wOufikepamwe, nEkandulepo lOluhepo kave na kutya ohava futwa naini ohashi shiiva pa pite omwedi ile eemwedi mbali inava mona okashona kavo. 

Erickson Ndawanifa okwa udaneka kutya otava ka ninga oihongi novadali opo udifeko ovadali oinakuwanifwa yavo, okwa popya va li kutya ota ka kwatafana nOvanambelewa okudja kOuministeli wOufikepamwe, nEkandulepo lOluhepo opo va  mone kutya oshike hashi fitikinineko eendjabi dovalongi veekinda.