Ehangano ndyoka hali andjakaneke omeya moshilongo olya kwashilipaleke kutya ominino dho meya ndhoka dha li dha lopotwa dha topa odha longwa.
Omukuluntu gwoNamWater Kaliki Kambanda okwa lombwele New Era kutya aanambelewa oya kala yiipwakidhila nokulonga ominino ndhoka okuza ongula yetiyali sho omunino gwotango gwali gwa lopotwa gwa topa.
Kambanda okwa hokolola kutya konima shi ya li ya longo omunino gwo tango oya dhimbulula kutya opuna omunino omutiyali gwa topa.
“Konima ashike shoo aanambelewa ya longo omunino gwotango uusiku wetiyali, aanambelewa oya ndhindhilike kutya opuna omunino omutiyali gwa topa pokati kaNdangwa naShali shono sha thigi Omuthiya oshowo iitopolwa yopopepi yaana omeya.
Okwati ominino ndhoka odha longwa nomeya oga tameka nale okweenda kiitopolwa mbyoka ya li ya gumwa.
Ashike okwati mboka yeli kokule nenge kehulilo lyomunino otashi vulika natango itaaya ka mona omeya mongaashingeyi oshoka oondama opo tadhi udhwa dhi wape okuthikitha omeya kiitopolwa ayihe.
NamWater okwali a tseyitha mEtiyali kutya omunino gwawo omunene pokati kOndangwa nOshali ogwali gwa topa.
NamWater okwati omolowa etopo lyomunino ngoka, Omuthiya oshowo omikunda dho po pepi odha lopotwa tadhi kala dhaana omeya.
Oya li ya kunkinkilile iipangelo oshowo oosikola ndhoka tadhiiyadha dhaana omeya dhi kwatathane no NamWater dhi tale nkene tadhi ka kwathelwa.