Omupopiliko wehangano lokuyandja ohonde loNAMBTS Titus Shivute okwa ti moule weemwedi nhatu da pita onghalo yomhumbwe yohonde koNAMBTS ya xwepopala neembaanga doipangelo odi na ohonde tai dulu okulongifwa oule eomafiku omuwoi fiyo 12.
Okwa ti ehangano ole shipondola okukala la ongela ohonde ihapu, oku yelakanifa neemwedi da pita. Ta ti paife ope na elunduluko llinene.
Shivute okwa ti ehangano loNAMBTS ola pandula oshiwana eshi sha kala shi na ohokwe yokukayandja ohonde komandiki a yooloka ayeshe moshilongo.
Okwa ti NAMBTS ota twikile nokukala a kwashipaleka kutya ovanhu ve li momhumbwe yohonde moipangelo ova pewa ohonde opo eemwenyo davo di kale da xupifwa.
Okudja omudo wa dja ko NAMBTS okwa kala a taalela eshongo linene lohonde ina i wana moipangelo novanhu va kale tava ende na kashona okukayandja ohonde.
Shivute okwa yelifa ta ti ohashi kala eshongo linene ngeenge ovanaudu va pumbwa ohonde ndele kai po.
Onghee okwa ti ota indile oshiwana opo shi twikile nokuholoka momwaalu munene shi ka yandje ohonde shaashi oku yandja ohonde otaku xupifa eemwenyo dovanhu ve li momhumbwe yohonde.
Okwa ti ohonde ei tai yandjwa koshiwana ohai kwafele ovanhu vena omikifi da yooloka ngaashi okangela, pefimbo oomeme tava pulumuna, omunhu ngeenge ta tandwa nosho tuu omikifi dikwao.
Okwa weda po ta ti omandiki ayeshe okuyandjela ohonde onghee nga tali twikile nokulonga efimbo keshe Omaandaxa fiyo etitano.