Ngoloneya woshitukulwa shaMusati Erginus Endjala okwa ti eepoloyeka dimwe moshitukulwa shaMusati oda kalekwa manga molwomutengenekwafaneko woshimaliwa oo tau ulike kutya inashi wana.
Edi Endjala okwe di koleka pefimbo leenghundafana naKundana onghela, ta ti eepoloyeka okwa fanekwa opo di ka ningwe momudo tau ya ngeenge onghalo yoshimaliwa oya xwepopala.
Ta ti opali pe na omafaneko etulomoilonga loneudo leepoloyeka gihapu dovanyasha ashike oupyakadi omhumbwe yoshimaliwa ina wana.
“Eepoloyeka ngaashi oikunino yomadama, opoloyeka yokutunga omatale nosho tuu eepoloyeka dikwao dayooloka itadi ningwa vali neudo shaashi ngeenge oda tulwa molilonga ohatu kala tuli meshongo loshimaliwa eshi tadi ka pula oshimaliwa shihapu,” Endjala ta ti.
Ngoloneya okwa ti omutengenekwa woshimaliwa shoshilongo ou shunifwa pedu owa kuma oikondo ya yooloka moshilongo, onghee oshiwana inashi kale shina omadiladilo kutya ombelewa yangoloneya waMusati itai longo sha.
“Ngeenge pena oshimaliwa sha wana oshi eta opo tu ninge eepoloyeka dihapu nokuyandjeka omayakulo moshiwana ashike ngeenge kape na sha oshimaliwa oinima ihapu itai dulu okulongwa,” Endjala ta ti.
Okwa weda po ta ti neudo ombelewa otai tula ashike eepoloyeka deepate moilonga, ngaashi opate yEpalela-Onesi-Tsandi nopate yandja koTsandi ya uka kOngulumbashe.
Okwa ti elalakano lokuninge eepoloyeka deepate neudo peenhele odo osheshi okwa didilikwa ku na oshiwana tashi mono oixuna keepate dii.
Endjala okwa ti moshitukulwa omu na eepoloyeka da yooloka ngaashi Outapi Business Park, Etunda Project nOmahenene Business Park hadi yandje omayakulo kovakalimo unene tuu eemhito doilonga.
Okwa kunghulila oshiwana opo shi kale tashi ningi omaindilo komahangano okuyambidida eepoloyeka davo ngaashi Agribank nosho tuu.