New Era Newspaper

New Era Epaper
Icon Collap
...
Home / Omikunda mOkahao odi na omeva mayela

Omikunda mOkahao odi na omeva mayela

2021-07-09  Festus Hamalwa

Omikunda mOkahao odi na omeva mayela
Top of a Page

Kansela woshikandjohoololo shaKahao Leonard Shikulo ota ti omikunda adishe dili moshikandjohoololo shaye odina omeva mayela okunwa mopaife.

Shikulo okwa hokolola ta ti mopaife ngaha omikunda adishe dili moshikandjohoololo shaye oda mona oupomba vomeva. Okwa ti pefimbo a ninga kansela woshikandjohoololo shaKahao okwa hanga omikunda dihapu dihena omeva mayela okumwa, omo a hanga ovanhu vahapu hava teke omeva meendungu ile momifima.

Shikulo okwa ti okuna oshisho noshiwana pefimbo a pewa oshinakuwanifa a ninge kansela woshikandjohoololo osho, onghee okwa ti okwa kala alushe ena elalakano opo keshe omukunda uli noshikandjohoololo shaye ukale wa mona oupomba vomeva.

“Ka kwali handi kofa shaashi oshiwana shange okwali shina omhumbwe yomeva ayela, onghee onda kala noku ninga eenghendambala dihapu opo ndikwashipaleke kutya keshe omukunda uli moshikandjohoololo shange owa mona omeva ayela. Onghee mopaife ngaha onde shipondola okukala da kandula po omukundu ou kwali tau dana onghandangala moshikandjohoololo shange womhumbwe yomeva,” Shikulo ta ti.

Shikulo okwa yelifa ta ti nomikunda edi dili keefuka nado odina oupomba womeva paife.

Okwa ti tete ovanhu okwali hava ende eendjiladiledile tava ka konga omeva komikunda edi dina eendungu da kula shaashi vati omikunda dimwe kadina sha eendungu.

 

Shikulo okwa weda po yoo ta ti oshikandjohoololo shaye oshina oupyakadi womhumbwe youpangelo ina va wana, omo ahokolola ta ti oshiwana oha shi ende eendjiladiledile tava ka konga ouhaku ko kule.

Okwa ti oshi li eshongo linene kovakulupe a va veli momikunda edi dihena oupangelo, yee ta weda po ta ti unene tuu ovakainhu a va velihumbata navo ova kumwa koupyakadi ou woupangelo ina va wana.

Onghee otai indile ngaa kepangelo opo ngeno litunge oupangelo vatatu moshikandjohoololo shaye. “Onda faneka ngeenge onghalo yoCovid-19 oya shuna kouwa opo ndi ninge eepoloyeka dovanyasha opo va kale tava landifa oinima yavo, vo vashiive va mone oyuyeemo noku hambula po oshikandjohoololo shetu,” Shikulo ta ti. Shikulo okwa ti oshiwana nashi kale tashi kwatafana nombelewa yaye una ngeenge shili moupyakadi wonumba.

“Natu liufeni komilandu doCovid-19 shaashi omukifi ou owa nyika oshiponga neenghono,” Shikulo ta ti.


2021-07-09  Festus Hamalwa

Share on social media
Bottom of a page