WINDHOEK- Omukwatakanithi gwiimbuluma noshowo omukoonakoni gwiimbuluma moshitopolwa shaMusati Deputy Commisioner Moses Simaho okwa ekelehi omapyopyo kutya opu na omukwashigwana gwaChina a yugwa oshimaliwa shi vulithe N$80 000 .
Omuchina gwedhina Wu Xian Liang mEtitano lyoshiwike sha zi ko okwa hokolola kutya okwa ponokelelwe kaalumentu ye li yatatu ya homata popepi naampoka hapu ningilwa omboloka moshitopolwa.
Okwa lopotele opolisi ndjoka kutya aalumentu mbaka oya li ye li moshihauto shedhina Mercedes Benz shonomola ndjoka kayi shiwike, ta ti oye mu zilile konima e taya palula ko ohauto ye, e taye mu thiminike opo a kankameke oshihauto she.
“Oya thikameke woo oshihauto shawo, eta ye mu ulike ondjembo noku mu ningila omambandameko nomatilitho kutya, yo oye li aapolisi . Oya matukile moshihauto she eta ya kutha mo iimaliwa koomuma,” osho olopota yopolisi ya hokolola ngaaka.
Ashike Simaho okwa hokolola kutya uuyelele mboka wa gandjwa kOmuchiina nguka kau shi wolela oshoka oombudhi olundji dha homata itadhi vulu okuyuga omuntu e tadhi thigi po ongodhi yopeke ndjoka tayi vulu okulongithwa opo ya lopotwe.
Okwa hokolola kutya opolisi oya ninga omakonaakono gwomuule noye li ya ipyakidhila nomakonaakono ihe ka pena natango uuyele wothaathaa mboka tau vulu okukwashilipaleka kutya omuChina nguka okwa yugwa shili oshimaliwa shoka.
Okwa tsikile ko kutya oshi li sha nika oshiponga unene ngele aakwashigwana otaya gandja uuyelele kau na uushili kopolisi shoka tashi etitha opolisi yi longithe oonzo opo ya ungaunge noshinima ihe nani kasha na uushili.
“Opolisi oya pumbwa ekwatho lyaakwashigwana ashike shoka itashi ti kutya uuyele naamboka wiifundja nawu gandjwe momutono ngoka taga ulike kutya owoshili. Onkene otandi indile kutya aakashigwana naya kambadhale aluhe ya gandje uuyelele opo shi kale shi li nawa ngele opolisi otayi ungaunga nuuyelele,” osho omuhwahwameki guuyelele a hokolola ngaka.
Okwa ti kutya ngashingeyi opolisi oya kambadhala okulombwela omukwashigwana gwaChina a patulule oshipotha shi na sha noshinima shika ashike okwa tinda.
Ta ti kutya shoka osho sha ulike kutya oshiningwanima shoka kasha na uushili washa.
Onkene opolisi oya pa ashike nguka oshiwike shika a kale a ipula ngele oshipotha sha holoka nenge a hawe ihe ngele ine shi ninga nena oku na oku ithanwa kopolisi opo pu ningwe omapulaapulo gomuule, gwo omakonakono moshinima shoka ngashingeyi otaga tsikile.