Opolifi koshitukulwa shaOutjo otai konaakona efyo lomulumenhu oo a dengwa nemanya pefimbo vati a li e lipyakidila ta kendabala oku kwata okaana kokamati onghonga.  Omulumenhu ou vati okwa li a monifwa oshiponga neenghono nokwa ka fila koshipangelo. Omufekelwa moshiningwanima omu omukainhu oo omido daye inadi popiwa. 

Oshiningwanima eshi osha ningwa ongula yEtitano mokati ashike kovanhu mOutjo. Otaku hokololwa omulumehu ou naye omido daye inadi shivika a hanga okaana kokamati meumbo lavo (meumbo lokamati) ndele te ka ponhokele a hala oku ka kwata keenghono. Okaana oke shi pondola okufaduka po, ashike omulumenhu ou okwe ka landula. Okwe ka taataa fiyo te ka kwata noku ka mbatekenena po.  Otaku hokololwa omukainhu umwe oo naye  a li ta ende mepandaanda lomolukanda laSaamstaan omo mwa ningilwa oshinima eshi a uda eshi okaana taka kuu.  Omukainhu vati okwa didilika kutya omulumenhu oo okwa hangwa nokuli a patulula ombulukweva yaye ye a mbatekela po okaana pedu, e ka kwete pofingo. Omukainhu vati okwa kufa emanya ndele ta denge omulumenhu oo komutwe. Okwa ufanwa opolifi oyo ye ya okumutwala koshipangelo kOutjo oko a ka xulifila.  Omukainhu okwa patululilwa oshibofa shedipao.