Omulumenhu weedula 46 okwa fya eshi eli mangeleka Etivali lwopotundi 16h00 momukunda Omunyekadi moshitukulwa shaHangwena.

Nakufya okwa tongolwa oye Ismael George Nelulu omuhongifikola, a kala ta wilike onga omukulunhu womalaka pofikola Oluwaya Combined School. Nakufya Nelulu omonamati welenga lashivika nawa George Nelulu.

Omupopiliko wopolifi woshitukulwa shaHangwena Inspector Kaume Itumba okwa hokolola ta ti Nelulu okwa hangika komukulukadi waye eli meemhango mongalashe yeetuwa efimbo lokomatango eshi omukulukadi kwa li tadi koilonga.

Omukulukadi vati okwa shivifila opolifi novakwapata.

Opolifi oya hokolola tai ti Nelulu ina fiya po omukanda tau yandje ouyelele kombinga yefyo laye, yee vali ina didilikwa a kala e na omalihumbato okulimangeleka.

Vati omukulukadi waye eshi aye koilonga efimbo longula efiku olo okwa lekela omushamene waye nombili kutya otai koilonga.

Omudimba waye owa twalwa kokila yopolifi yaEenhana opo u ka ningilwe omakonakono.

Nelulu ota lililwa keumbo latate waye komukunda Etomba moshitukulwa shaHangwena nomalongekido epako okuli metifa. – fhamalwa@nepc.com.na