Omukainhu weedula 36 okwa tambulilwa moshipangelo shaShakati konima eshi vati a tetaulwa nomakatana komulumenhu waye mukulu. Oshiningwanima osha ningwa momukunda Oshali moshitukulwa shaHangwena mexuliloshivike efimbo loufiku lwopotundi 22h40. Omukulunhu wopolifi koshikondo shokukonakona oimbuluma omupedu Commissioner Zachariah Amakali okwa hokolola ta ti omufekelwa okwa hanga nakuninga oshihakanwa a kofa meumbo lavo. 

Okudja opo vati okwe mu pula kutya omolwashike ine mu hala vali nokonima okwa kufa ekatana ndele te mu tetaula lwoikando ya yooloka. 

Omukainhu ou vati okwa tetwa kwokooko noshoyo kofingo, okwa li a twalwa koshipangelo efiku tuu olo. Otaku hokololwa kutya omulumenhu ou oha kala shito ta kondjifa nakuninga oshihakanwa opo ve lishunine ashike omukainhu ina hala vali okukaleka po ekwatafano lavo lopaihole.

Omufekelwa okwa kwatwa po nota holoka momhangu nena, ota pangulilwa oshibofa shonghendabala yedipao. 

Opolifi oya hokolola tai ti okwa didilikwa ovakainhu va ninga oihakanwa yokuningilwa omahepeko oukashikekookanhu, onghee ovakainhu otava kumaidwa opo va kale tava lopotele opolifi ile eembelewa doukashikekookanhu ngeenge tava hepekwa. 

Ovaholafani ova kumaidwa yoo vali opo va kale tava ka konga omakwafo kovaxungimwenyo ngeenge ve lihange ve na omaupyakadi momakwatafano avo opaihole.

-fhamalwa@nepc.com.na