Opolisi moshitopolwa shaShana otayi indile oshigwana opo shi lopotele opolisi yi li popepi uuna sha mono omukiintu gwomimvo 23 ngoka a kana.

Omugandji gomauyelele gwopolisi moshitopolwa shaShana Thomas Aiyambo okwa ti omukiintu ngoka a tseyika nedhina Beata Kayuhwa okwa kanene Osoondaha ya zi ko, sho a li a zi megumbo moshanga shomutenya kEkuku mOshakati.

Otaku hokololwa kutya kakwa li a popya mpoka ta yi, nongodhi ye yopeke oya kala nokudhengwa ihe itayi yamukulwa.

Opolisi oya ti aakwanezimo oya kala nokukonga omahala hoka ta fekelelwa e na okukala a yi, ihe ina thika ko.

Omukiintu ngoka anuwa esiku a li a kana okwa li a zala ombindja yi na omalwaawa omatiliganeshunga nolutsimine, osho wo hulukweya yolwaala lwoshiyokahi. 

Otaku hokololwa kutya ngele okwa thikwa ke tumwalaka ndika na kambadhale a tseyithile aakwanezimo mpoka e li opo ya ze momalimbililo.

Nenge ngele ope na ngoka e na uuyelele mpoka pe na omukiintu ngoka na tseyithile opolisi yi li popepi naye.

vkaapanda@nepc.com.na