Opolisi moshitopolwa shaHardap oyi li metifa okukonakona shoka sha ndhipaga omukulupe gwomimvo 83 Johanna Hendrihetta Simon ngoka a li aadhika asa sho a li athigwa a dhitikwa kaafuthi.

Sha ikolelela kepeko lyopolisi, omukulupe ngoka anuwa okwa li a thigwa adhitikwa kaafuthi megumbo lye koMariental.

Otaku hokololwa kutya oshiningwanima shoka osha holoka pokati komasiku 27 May no 28 May nuumvo mepandaanda Aub.

Opolisi oya ti, aafuthi mboka okwa li ya ponokele egumbo ndyoka, ya ngwala komweelo gokonima yegumbo noku manga omukulupe nomukiintu gumwe noongondhi.

Tayi ti, aafuthi mboka taku hokololwa ye li yane okwa li ya tutumo iinima megumbo, omanga yathiga ya manga aantu.

Tayi gwedha po kutya omukiintu ngoka a li naye amangwa okwa li eshi pondola okwiimangulula, sho aafuthi ya yi.

Sho anuwa aka tala omukulupe okwaadha nale ahulitha.

Opolisi oya ti, sigo ompoaka ka yina uyelele wothaatha kutya oshike sha eta eso lyomukupe, nonando taku fekelwa kutya okwa si pamwe sho ko kwaafudha nawa oshoka okwa li amangwa.   

Otaku hokololwa kutya sigo ompaka ongushu yiinima mbyoka ya yi ontuku naafuthi inayi shuwike.

Aafuthi mboka kayeshi wike, omakonakono gopolisi oge li metifa.

– vkaapanda@nepc.com.na