Omukulupe gwomimvo (72) Wilka Mbinga ta tamenekelwa edhengo lyi nyanyaleka lyomona okwa mangululwa mondholongo.

Kuuyelele wa gandjwa kopolisi, omukulupe okwa li a mangululwa mEtiyali.

Omukulupe kakwa li a pulwa a fute eifutilemo, nonando okwa li a pewa omalandulathano noompango e na okulandula nokusimaneka.

“Inandi mu dhenga ee ta ka tetwa okwaako. Onde mu dhenge ashike kashona. Shapo okwi ihata po okuza koondingosho hoka hayi a ka nwe omalovu,” ta popi ngaaka.

Mbinga dhoka okwe dhi popi nomahodhi taga tondoka poompanda dhe, esiku a li a holoka mompangu yaMangestrata mOndangwa mOmaandaha. 

Mangestrata Gabriel Perestrello esiku ndyoka okwa li al ombwele ompangu kutya otayi vulu okwiindika eifutilemo, ihe okwa li wo a popi kutya Mbinga omukulupe unene ngoka ihaa vulu okweenda nokuthikama nawa.

Oshiningwanima osha holokele momasiku 06 gaAguste nuumvo momukunda Omulondo moshitopolwa shaShikoto.

 Omukulupe okwa tamenekelwa omahepeko gwomomagumbo, noshipotha she okwa li sha undulilwa momasiku 28 September 2021, okugandja ompito oshipotha shi konaakonwe nawa.

Ta ti, kamu na uushili mehokololo lyomona, ta  popi ta ti, shapo okwa ihata po, oshoka ye ine mu dhenga unene a vule okuteka, opo a ka tetwe okwaako.

“Onda taalela omahepeko gaanona yandje, ondi na aanona yahetatu, ihe gumwe  ashike  hatu kwatathana naye, ayehe omitse odha tanganana,”  Mbinga ta hokolola.

Ta ti, onkalamwenyo ye oya lunduluka yu uka kuuwinayi konima yeso lyomusamane gwe mo2004.

“Aanona yandje oya pikwa kiikolitha nesimaneko megumbo kali mo. Kamu na omukuluntu nomunona,” ta hokolola neyeme.

 “Okw ali nde mu dhenge oshoka onde mu lombwela kutya mokombitha yandje ina ya mo we. Okwa a li mo osipayisa yandje,” omukulupe ta hokolola.

Mbinga okwa ti, nonando omona ngoka okwa aluka ina galukila mo megumbo lye.

Moonkundathana naKundana Wilka Shikongo (45) ngoka a tetwa okwaako okwa ti oku li monkalo yi li hwepo. 

“Onda lalekwa nokwa li nda kuthwa oongodhi dhiilalo ohela,” ta popi ngaaka.