Omukulupe weedula 60 nomonamati weedula 17 ove li moshipangelo monghalo ita nuwa omeva eshi vati ve li monifa oshiponga pefimbo kwa li tave li denge meumbo lavo.

Oshiningwanima eshi osha ningilwa momukunda Omatunda moshitukulwa shaHangwena Etitano efimbo lokonguloshi.

Omukonakoni woimbuluma wopolifi moshitukulwa shaHangwena omupedu Commissioner Zacharia Amakali okwa hokolola ta ti omukulupe okwa li tava tanguna nomona konima eshi vati omona a dja keendingosho fiyo tashi eta olwoodi pokati kavo.

Vati omona okwa twa xe tete nombele yokapi kofingo loikando ivali nokonima xe naye okwa ka tala oshikuti shaye shouta ndele ta tu omona medimo.

Opolifi oya ti ovashe ove li moshipangelo shaShakati tava mono epongo lopaunamiti.

Opolifi oya hokolola tai ti ka pena oshibofa shapatululwa fiyo opapa.

Opolifi oya ti e longifo nai lomalodu noingangamwifi oshimwe ohashi eta ovanhu ve li denge momaumbo onghee oshiwana osha kumaida opo shi xulife po okukala tashi tanguna ngeenge sha kolwa noshoyo okukala sha umbata oilwifo. - fhamalwa@nepc.com.na