Ohanana oya li ya sile momulilo ngoka gwa yangata po oombashu molukanda lwedhina Twaloloka moWalvis Bay mOsoondaha. Omukwatakanithi gwomakonaakono giimbuluma moshitopolwa Erongo Deputy Commissioner Erastus Iikuyu okwa ti kutya okamati haka oka li ke na omvula noomwedhi hetatu. Yina yokamati haka naye okwa li wo a ehamekelwa moshiponga shika. Omulilo ogwa li gwa tameke lwopotundi 19h00 nogwa li gwa fike konyala etata lyoombashu molukanda moka.
Iikuyu okwa ti nando omwaalu gwothaathaa inagu tseyika natango, ashike otaku tengenekwa konyala oombashu 300 dha pya, naantu ye vule po 1000 ya gumwa koshinima shika. Katu na uuyelele kutya omundilo ogwa etwa koshike ashike kuuyelele inaawu kolekwa owo mbuka kutya otashi vulika gwa tamekela mombashu moka mwa pila okamati,” ta ti ngaaka. Ta ti okwa lopotwa ashike eso limwe.
Twaloloka olukanda lwaantu ye vule 2 500, mboka ngashiingeyi ya thigwa pomutenya.