Oomwenyo dhaakwashigwana pomukunda gumwe mOshitopolwa shaMusati odhili moshiponga, sho omunageshefa gumwe a tete po omataagulukila, gokanala kaNamWater hoka ka ende moshitukulwa shawo.

Otaku hokololwa omunangeshefa gwedhina Gideon Nambala a kutha po okandelefa komataagulukilo pokanaala noku ka tula popepi negumbo lye, naashiika osha eta opo aakwashigwana, mwa kwatelwa aakulupe naanona ya taaguluke okanaala taya longitha iiti mboka ya nika oshiponga noonkodo. Oshiningwanima shika oshikumithi osha ningwa momukunda Omatelekelo popepi nOnhokolo mOmbalantu moshikandjohogololo Ogongo moshitopolwa shaMusati momumvo 2018. Omunangeshefa nguka okwa li a itaala kutya okandelefa haka komataagulukilo okwe ka lundulula anuwa oshoka oke li kokule naakwashigwana nokwe ka eta popepi nayo.

“Okandelefa oka li kokule na kaka li haka longithwa kaantu oyendji. Onde ka kutha ko, ee tandi ka longo nawa noku ka eta popepi. Shika onde shi ningila uuwananwa woshigwana,” ta fatulula ngaaka. Okwa li wo a pula kutya omolwashike aantu opo taya popi oshinima shoka nuumvo.
“Onda li nda pulwa kumwnene gomukunda osho wo komalenga opo ndi fatulule kutya onde shi ningila shike nonde ya lombwele kutya onde shi ningila uuwananwa woshigwana. Oye shi uva ko nawa,” ta ti ngaaka. Nambala ngoka ha ngeshefa moshimpungu shiikwamawawa osho wo iikunino okwa ti oshinima shika osha kwatelwa komeho kwaamboka ye li ompinge nesindano lye lyomongeshefa.
Sho a lundulula okandelefa haka, shika osha thiminike aakwashigwana opo ya tule iiti ya tapakana okanaala opo ya wape okutaaguluka osho wo ya keelele aantu kaya se omeya, unene aakulupe nuunona wosikola.

Okavidio hoka ka monika kuKundana oka li ki ihanene komalungula noke na aakulupe yaali taya taaguluka okanaala taya yambidhidhwa komugundjuka gumwe taya longitha iiti yomisaati. Ta popi naKundana ohela, kansela gwoshikandjohogololo Ogongo Wilhelm Iyambo okwa li a koleke oshiningwanima shika ta ti kutya nakufekelwa okwa li anuwa a lundulula okandelefa haka mo2018 noku ka tula pehala ndyoka lyi li komeho gegumbo lye opo ye mwene nofamili ye ya vule okutaaguluka nuupu. Iyambo ta ti okwa li a ninga onkambadhala okulopota oshinima shoka kopolisi ashike okwa li a lombwelwa kutya omuntu ngoka e na uuthemba mboka okupatulula oshipotha omwene gwomukunda.
“Onda lombwela opolisi ngame mwene mbalambala sho nda tseya oshinima shoka, ashike onda li nda lombwelwa ndi lombwele mwene gwomukunda a patulule oshipotha. Onda li nde mu lombwele nonda kumwa sho inaapu patululwa oshipotha sigo opompito ndjika,” ta ti ngaaka.
Ta gwedha po wo kutya aanamukunda oya li ya ningi oshigongi hoka a li a hiywa monakuziwa nokwa li ya tokola ya umbe ongalo okuza megumbo kehe opo ya tule po okantopa okape omanga oshinima tashi potokononwa.

Mwene gwomukunda pakathimbo osho wo amushanga Letisia Andjene okwa li a lombwele oshikundaneki shika kutya aanamukunda oya li ya tokola egumbo kehe lyi umbe N$50.00 nasigo oompaka oya gongela po N$1600. Ta ti momukunda omu na omagumbo ge li 168.