ONGWEDIVA - Omulumentu omugundjuka ngoka a li omunangeshefa Erick Elvis, okwa hulitha moshiponga shohauto, sho a li a sindwa oonkondo kohauto etayi galangata,  kOngulohi yOlyomakaya.  
Elvis oku li gumwe gwomaalumentu aagundjuka yatatu mboka ya si miiponga yiihauto mbyoka ningwa mehulilo shiwike.  
Oshiponga shimwe oomoka iihauto iyali ya i dhenge mumwe omutse nomutse koongulasha dhoSoondaha ya faalele oomwenyo dhamati yatatu mOshakati.

Sha ikolela kepeko lyopolisi, ohauto yoToyota Hilux ndjoka yali yina aamati mboka ya hulitha omanga gumwe e li monkalo ombwinayi moshipangelo oya idhenge mumwe no hauto yo Polo Vivo. 
Otaku hokololwa kutya okwali tadhi hingwa okuza koombinga dha yooloka etayi idhenge mumwe omutse nomutse. Oshiningwanima shoka oshaholoka lwopotundi 04h00 mepandaanda enene lyaShakati. 

Oonakusa oya tseyika nomadhina Herman Tangeni Jason, a tseyika nawa Bickile (24) oshowo Joseph Elifas a tseyika nawa nedhina Kippi, (25) nomutitatu okwa dhimbululwa owala nedhina Chabby. 

Bickile okwa hulithila poshiponga omanga, Kippi okoshipangelo nomuhingi  gwoPolo Vivo ina mona oshiponga unene. 
Oshiponga shoka shafaalele omwenyo gwomunangeshefa Erick Elvis, osha ningilwa kokapate kAdolf-Onamutai. 
Shik osha holoka lwopotundi 21h00 Olyomakaya. 
Otaku hokololwa kutya omulumentu ngoka oye awike a li mo moshihauto she.
Okwali ta hingi ohauto yoToyota bakkie, no kwali a hulithile poshiponga mpoka. Aakwanezimo ayehe oya tseyithilwa.