Omunyeumbo weedula 51 vati okwa hekela ouleke okaana kaye keedula 13 noku ka kwata onghonga.
Oshiningwanima osha ningwa pokati komafiku 19 nomafiku 20 omwedi ou komukunda Onambeke moshitukulwa shaShikoto.
Omupopiliko wopolifi omupedu Commissioner Kauna Shikwambi okwa hokolola ta ti omufekelwa okwa fiya omukulukadi waye keendingosho noku ya keumbo. Otaku hokololwa kutya omufekelwa e shi a fika meumbo okwa pendula ounona vaye noku va pa ouleke.
Opolifi oya hokolola tai ti nakuninga oshihakanwa oye a kula kounona vakwao ovo va hangika a nangala navo.
Okudja opo vati omufekelwa okwa longela okaana kaye omunyonena wopaixulo noku ka ningila omatilifo kehe shi popye.
Otaku hokolola kutya omufekelwa ou okwa li a kolwa molwaashi okwa uhala keendingosho nomukulukadi waye tava nu okatombo.
Opolifi oya ti ouyelele ou owe uya kombada konima eshi okaana ka shivifila ovashiinda nokulopotela opolifi.
Omufekelwa okwa faduka po onghee oshiwana otashi indilwa opo shi lopotele opolifi kombinga yomufekelwa ou.
Okaana oka twalwa koshipangelo opo ka ningilwe omakonakono opaunamiti.
Ovakainhu otava kumaidwa opo vaha fiye vali ounona voukadona momaumbo novalumenhu molwashi ovalumenhu vopaife ohava kwatwa komhepo yoku ya moixulo nounona vavo. Ounona voukadona vatatu ova loptwa neudo va pewa omateelelo kooxe omanga vamwe ohava pewa omateelelo kovamwainamati.
Neudo moshitukulwa shaMusati omwa lopotwa omulumenhu vati a kwata okaana kaye keemwedi nhatu onghonga.
Opolifi oya ti ounona voukadona kave li vali meameno ngeenge ve li momaumbo novalumenhu