New Era Newspaper

Icon Collap
...
Home / Omupolisi a si moshiponga shohauto

Omupolisi a si moshiponga shohauto

2021-02-23  Victoria Kaapanda

Omupolisi a si moshiponga shohauto
Top of a Page

Omunamimvo 32, oshilyo shetanga lyopolisi  okwa hulitha moshiponga shohauto Etitano lya zi ko mondjila onene yaShakati, sho ohauto kwa li ta hingi yi ipumu mumwe oshipala noshipala nohauto yoLand Cruiser.

Omupopiliko gwopolisi moshitopolwa shaShana Frieda Shikole okwa ti, oshiningwanima shoka osha holoka ethimbo 19h00 komatango, momukunda Emono. Otaku hokololwa kutya omufaalelwa ngoka a li nokanona ke komimvo ndatu, oku li monkalo ombwiinayi moshipangelo oshinene shaShakati. Shikole ta ti, omuhingi gwoLand Cruiser, omukiintu gwomimvo 51, ina mona oshiponga nonando ohauto ye, okwa li ya galangata ko lumwe. Ta ti, nakusa okwa li ta hingi ohauto yoToyota Runx ta zi kOshakati, omanga oLanda Cruiser kwa li tayi zi kOshikuku sho oohauto ndhoka kwa li dhi ipumu mumwe oshipala noshipala, nomuhingi gwoRunx opo a hulithile poshiponga mpoka. Otaku hokololwa kutya nakusa okwa li a tetwa mo mohauto, opo olutu lu vule okukuthwa mo.  Nakusa okwa tseyika nedhina Gwashinime Patrick a yambukile momukunda Oikango 4. Aakwanezimo yanakusa oya tseyithilwa. Moshiningwanima inaashi faathana, omulumentu gwomimvo 37 okwa li a lundululile oshituthi shenyanyu moluhodhi sho i imangeleke ethimbo lyeshasho lyokatekulu ke. Shikole okwa ti oshiningwanima shoka osha holoka lwopotundi 21h00 yuusiku Osoondaha ya zi ko pegumbo lye, mOshakati shokuninginino. Otaku hokololwa kutya omulumentu ngoka oye kwa li omupopi gwesiku a simana poshituthi sheshasho lyokatekulu ke, ka valwa kumumwayina.  Ta ti, anuwa okwa li a nu omalovu sha pitilila, ta tameke okuhinda kehe gumwe poshituthi mpoka.

Shikole ta ti, omulumentu ngoka anuwa okwa kumagidhwa a hulithe po shoka ta ningi oshoka ota tidha aayenda, ihe ota tsikile owala. Ta hokolola ta ti, okwa li a gandwa kutya ngele ota tsikile okupiyaganeka aayenda ota falwa kondjedhililo. Shikole ta ti, anuwa shoka osha li she mu geyitha, nahugunina okwa li a thigi po kehe gumwe, niitya yahugunina ta ti ota ki idhipaga.
Ta ti, anuwa kape na ngoka a li e mu landulile megumbo oshoka okwa li ye shi ota ningi omashendjo. Otaku hokololwa kutya sho aanegumbo ya mono pwa piti ethimbo ele inaa galuka, oya yi ya ka tale mo megumbo, ashike okwa li ya adha olutu lwe lwa endjelela moombuli dhondunda, a sa nale.  


2021-02-23  Victoria Kaapanda

Share on social media
Bottom of a page