New Era Newspaper

Top Featured
Icon Collap
...
Home / Omwaalu gomangundumano gwa shunwa pevi

Omwaalu gomangundumano gwa shunwa pevi

2021-01-14  Victoria Kaapanda

Omwaalu gomangundumano gwa shunwa pevi

Omangundumano ga shunwa natango pevi okuza paantu ye li 50 meni lyehala lyontumba oshowo aantu 100 pondje yehala limwe, nogwa etwa sigo aantu 50 pehala alihe.

Ndhoka odha popiwa kuminista guuhaku nonkalonawa Kalumbi Shangula sho a li a ningi etseyitho lyomalandulathano omape ga tulwa po okukeelela omukithi gwoCovid-19, ngoka tagu ende gwa uka pombanda esiki kehe moshilongo.
“Omukithi gwoCovid-19 otagu ende gwa uka pombanda molweetho nduka olutiya, shi vulithe olweetho lwotango. Iipangelo oyu udha oshowo iipangelo yopawumwene kayi na we omahala gokutaamba aanumvu oshoka kape na iifudhitho noombete dha gwana,” Shangula a popi ngaaka.

Ta ti, aapangi ye li yahamano oyakanitha oomwnyo dhawo omolwa omukithi nguka omanga ye li 1 350 yakwatwa.
Ta gwedha po ta ti, miiwike iyali ya piti, iipotha yi li  6 402 oya li ya ndhidhilikwa okuza maantu 26 191 ya li ya tutswa omukithi gwoCovid-19.
“Antu ye li piituthi ya yooloka yi na omangundumano naya gwanithe po omalandulathano agehe ga tulwa po okukeelela omukithi nguka. Omukithi ohagu taandeele mbala okuza momangundumano ngaashi epatuluko lyoosikola,” Shangula ta ti. Shangula okwa popi ta ti, olweetho nduka olutiyali olwa ndhindhilikwa lwa faalele nokukwata unene aakokele.

Ta ti, aakokele ye na omimvo dha pita 60 osho wo aanona ye li kohi yomivo 10 otaya kumagidhwa ya kale momagumbo ethimbo alihe.
“Uumaska nawu zalwe nawa ngaashi naana omalombwelo taga ti mokati kaantu, naamboka ye li moohauto ethimbo alihe,’’ Minista a gwedha po ngaaka.

Omalandulathano ngoka ga tulwa po okuza uusiku wonena sigo 03 gaFebuali numvo otaga ti, okangendjo kuusiku otaka tsikile okuza 21h00 sigo 04h00 yongula.

Ta ti, omuntu kehe  ta ka sa komukithi gwoCorona oku na okukala a fumbikwa muule womasiku gaheyali.
Omalovu otaga tsikile okulandithwa pokati koowili 09h00 yongula sigo 20h00 yuusiku, ihe inaga pitikwa okulandithwa mOsoondaha.
Osikola otayi patuluka momasiku 26 gaJanuali.   


2021-01-14  Victoria Kaapanda

Share on social media