Selma Gumbo

Aakalimo yokiikandjohogololo Epupa oshowo Opuwo oya tembukile kOndoolopa yOpuwo, taya kongo uulithilo wiimuna yawo.

Aakalimo yokomikunda dhokokule moondundu, ngaashi Ondije, Otjinungua, Okatumba Kovipoza, Otjikongo oshowo Otuherera oya tembukile hoka, oshoka anuwa inaya mona omuloka omwaanawa komikunda dhawo. 

Taya lombwele aanambelelwa yuuministeli womawuyele taya ti, yamwe oya kanitha iimuna yawo. Taya ti, anuwa mesiku iimuna ya thika 10 ohayi si kondjala.

“Oyendji oya zi komikunda dhawo nelalakano lyokuya okukonga uuluthilo wiimuna yawo, ihe natango omvula kayi ko. Shika otashi ulike kutya Kunene okwa dhengwa kondjala, nepangelo olya pumbwa okukwathela mendeelelo, omanga aakalimo inaaya ya muupyakadhi,” Kansela gwOpuwo  Ueutjerevi Ngunaihe ta ti ngaaka. Nonando oluhwa ota lu monika lwa ziza nawa, kape na omwiidhi  nomeya giimuna.  Aantu ohaya ende iinano, oku ka tala omeya gawo gwokulongitha oshowo giimuna, oshoka omuthima ogu li kokule.

“Ngaashi mwa tala ngaaka, omu wete kutya kape na omeya giimuna, ohatu yi meendundu tu ka konge omeya,” omunamukunda Tobias Munongo ta popi ngaka. Oyendji ohaya hupile miimuna yawo, unene momahini giikombo, ihe sho iimuna itayi mono we iipalutha ya gwana, nena oya nanga po.

Yamwe otaya hupile moopenzela dha wo oshowo moonyama dhiimuna mbyoka tayi si kondjala. Ta ya ti, iimuna yimwe ihaya vulu okuyi landitha, yimwe ohaye  yi mono ya mbuta nale. “Oto ti ngaa hwepo, oshoka  yimwe oyina omwidhi gwokulya nonando iangu gwana, ihe oya kwatwa koshimela. Aantu kombimnga huka otaya mono iihuna, ota tu ka tala omeya ko kule pombanda yo mitse. Otatu hupile mokamaliwa okashona kopenzela ko komwedhi, hoka haka pu po ngele twa landa iilongithomwa yaanasikola,” omunamukunda Karinjengia Koruhama.

Ombelewa yaKansela kOpuwo, oya kwashilipaleke kutya oya ningi omayindilo kuuministeli wuunamapya omeya niikwambuga  waandjaneke omeya  kaantu  moshitopolwa moka, noya tegelela omakwatho ngoka.