Festus Hamalwa

Ovanafikola vOndodo onhi-10 kosekundofikola yaShituwa ova tameka etundi davo Omandaxa oshivike eshi. 

Ongudu yovanafikola ovo kaya li ya tameka ofikola  shaashi omuhandjo wofikola yavo kawa li wa pwa oku tungwa. Omuhandjo wofikola owa tamekwa oku tungwa mo 2016 ashike opo wa pu neudo oku longa. 

Eshi osha eta ekate ko opo ounona vOndodo onhi 10 va kale inava tameka  ofikola pefimbo ngaashi shali sha va teelelwa. Omukulunhufikola Hendrick Nghinyengwasha wOsekundofikola ei okwa koleka kutya ovalongwa veli 580 vOndodo onhi-10 ova tameka netundi davo Omandaxa oshivike eshi. Ta ti ovanafikola ava ove li meengudu mbali, vamwe otava di komaumbo omanga vamwe ohava nangala momuhandjo.

Okwa ti omuhandjo wofikola ou kwali tau longwa owapwa oku longa paife nonande kamu na eembete dawanena ovanafikola aveshe.

Nghinyengwasha ta ti nonande eembete dili momuhandjo ina diwana, eshi kashi shi vali eshongo linene osheshi epangelo otali ka kadula po omukundu ou meendelelo.

Ta weda po ta ti molwaasho ova kala pedu efimbo lile, ovanafikola ovo otava ka pewa etundi mefudo nomomaxuliloshivike opo ku kwashipaleke kutya oilongwa yavo kai li konima.

Nghinyengwasha okwa popya vali kombinga yekulo lokutelekela kutya ina li pwa natango oku longa, onghee ovanafikola ohava telekelwa mekulo eli likulu. Omukunhufikola ta ti oshili eshongo linene ngeenge tashi ya kekulo shaashi kaku na oilongifo yawana oku longifa opo i shiive i kwafele omwaalu wonafikola vahapu.

“Ohandi tu ovanafikola omukumo opo ova longe nondjungu nokuli tula mo moilonga yofikola opo va pite nawa noitwa yopombada,” Nghinyengwasha ta ti.

Okwa twa omufindo ovalongi opo va longe noudinini nokukwashipaleka kutya ovanafikola vondodo onhi-10 ita va kakala nande veli konima noilongwa yavo. Pexulilo okwa pandula ovadali vounona vondodo onhi 10 eshi va kala nokulididimikila ounona vavo eshi va tameka ofikola kwalata. Okwa ti yee pamwe novalongifikola vomosekundofikola yaye otava kwashipaleka kutya keshe okaana otaka ka mona elongo la henena.