Victoria Kaapanda 

OSHIKUKU-Omunangeshefa mondoolopa yaShikuku ota ti ongeshefa  itayi ende nawa nando, ngaashi omimvo dha piti.
Petrus Shihepo okwa yambukile koKavango West, nokwe ya okukongo uuhupilo  mOshikuku nokulanditha omihi, iishini, omatiti, oondhimbo niikwawo oyindji mbyoka ha hongo noku eta po noonyala.
Shihepo tat i  onkalamwenyo oya dhigupala ngashingeyi, iilandithomwa ye okwa li hayi kwata ashike oshiwike yo oya pwa po ye ta ka honga yimwe koKavango oshowo okutalela po nokufaalela aakwanezimo ye omboloto.
“Oomwedhi ndatu ohadhi vulu okupita inandi shuna koshilongo, oshoka ongeshefa itayi ende nando, kandi na iimaliwa yokuya kegumbo oshowo okufaalela aakwanezimo yandje sha”. Shihepo ta ti ngaaka.
Ta gwedha po ta ti omimvo mbali dha ka pita, okwa li  ha mono oshimaliwa sha thika poN$10 000 moshiwike shimwe okulanditha iilandithomwa ye mbyoka ha eta po noonyala dhe.
Shihepo okwa li a gandja omanyenyeto ge kutya Aanamibia kaya ihole nando, ngashi ya tala e na ongeshefa yi li kohi  yomuti itaya hala oku ya po ya sapote, ihe, oya hala ashike oku ka landa moositola dhaatiligane nenge dhaakwiilongo yo taya taagulukitha iimaliwa moshilongo.
“Pehala e ye pungame e tati, ningila ndje okakopi ,ota yi koGame nenge koPep. nena otatu iyambula po ngiini, sho taku ti kamu na iimaliwa moshilongo otse tatu yi gandja po kiilongo yokondje”.
 Aaludhe naya ilonge okuholathana opo ashike taya humu komeho, naya kale taya sapotathana, nokusimaneka omuthigululwakalo gwawo, ta ti shoka sha etwa po niikaha ohashi kala sha kola shi vulithe mbyoka ya etwa po komashina ashike aakwashigwana kaye shi uvite ko nande.
Omunangeshefa okwa li a gandja oshiholelwa shaamboka haya landa iikutu yoohango nenge yiituthi ya yooloka kiilongo yokondje, omanga, moshilongo mu na aahondji mboka taya vulu oku eta po ashihe shoka taya landa kiilongo yokondje.
Ethano ndyoka otali ulike nale kutya aaludhe inaya isimaneka nando, aahondji otaya lili kaye na ookasitoma ihe, iimaliwa otayi zi moshilongo tayi ka landa kondje yoshilongo, ta ti nasho osha pumbwa oku tulithwa po, epangelo nali tale po nawa mpoka.