Secilia Haipinge (45), a yambukile komukunda Okahuyulu muuninginino wOshikango moshitopolwa shaHangwena, ota indile omakwatho moshigwana, shi mu yambidhidhe nokashona shi na po, omolwonkalo a tulwa muyo kuunkundi nokaanona.
Haipinge oku na aakwanambwiyu paali – iisheli, omumati nomukadhona ye na omimvo 11, aakwanambwiyu yaamati yomimvo ntano oshowo onkelo yomumati gwomimvo ine ngoka anuwa omuntu gwandohotola, e na uunkundi womutima nombinzi onshona molutu.
“Onda thigwa po komadhilaadhilo, he yaanona yandje nkene a yile moAngola omvula ya zi ko, onkelo yandje oya pewa iikulya kundohotola mbi e na okulya ihe kandi na iimaliwa yoku yi landa. Kandi na sho tandi palutha nasho aanona yandje yaakwanambwiyu,” Haipinge ta popi ta lili. Ta hokolola ta ti, ke na iikulya megumbo, kakele kuusila mboka ha teleke nawo etete, omwiha nuulalelo. Ta ti aanona oya ningi esiku ya kwatwa koshimela ayehe. 

Haipinge ta ti uunona we kawu na iizalomwa, ta ti ota pandula aakwanambwiyu ye yomimvo ntano oshoka ihaya kwatwa lela kuuvu kakele koshimela shoka she ya kwata paife, oshoka ngeno ke na sho te ya zaleke oku ya fala koshipangelo.
Ta ti, oshimela shoka sha kwata aanona ye, okuwete kutya oshokatete kakehe siku, ta fatulula ta ti shika ondjala.
“Iilonga yomepya itandi yi vulu we, nangame onda ningi omuntu gwandohotola okuza omvula ya zi ko. Ihandi lala nda kotha omolwonkalo tu li muyo naamwandje, unene mboka haya yi kosikola nomapunda ga ekama,” Haipinge ta hokolola newi lya thita kokulila.
Ta ti onkalo e li muyo ine yi halela nande omuntu, oshoka oyinyanyaleka. Ta popi ta ti oshidhigu okutala uunona we tawu lili nokulala nondjala, nongele oya li esiku ndyoka, etete, ihe kalyi na osuuka.

Haipinge ta ti omalombwelo gandohotola kutya okanona hoka ke na uunkundi nakalye iikulya ya opalela onkalo yako, ita vulu oku ga gwanitha po oshoka ke na iimaliwa yokulanda iikulya mbyoka.
“Okanona haka natango ohandi ka fala koshipangelo kEngela kehe kehulilo lyomwedhi ka ka wendwe, ihe uupyakadhi aluhe oshimaliwa sholefa. Onkalo ndjika ondhigu Kalunga kandje, omadhiladhilo og aningilandje ogendji,” Haipinge ta popi ngaaka.
Moonkundathana naKundana omwali nguka okwa ti ota indile unene okanona ke konkelo ka yambidhidhwe niikulya ka pulwa kundohotola opo a kaleke po uundjolowele wako.
Ta ti, natango ota indile kukehe ngu ta vulu e mu yambidhe niikutu iikulu yaanona ye yaakwanambwiyu oshowo iikulya.