Okwa didilikwa ovanhu vahapu hava kwatele ovakulupe tava hanauna po oshimaliwa shovakulupe momalodu nomoinima oyo ihe na sha novakulupe.

Vati ovo kwa didilikwa tava li po unene oshimaliwa shopendjela ovapambelele vovakulupe, oshinima osho nokuli hashi eta opo ookansela va lopote oiningwanima ei kombelewa youkashikekookanhu.

Kansela Andreas Amundjindi okwa ti ovakulupe vamwe moshikandjohoololo shaye ihava longifa vali oshimaliwa shavo moipumbiwa oyo ve na oku shi longifa molwaashi ovanhu ava have va kwatele opendjela ohava longifa oshimaliwa osho papuko.

Onghee okwa ti eshi oshi li eshongo linene la taalela oshikandjohoololo shaye, Uukwiyuushona.

Meenghundafana a ninga naKundana Etivali Amundjindi okwa ti ombelewa yaye ohai mono eelopota dihapu kombinga yovanhu tava longifa nai oshimaliwa shovakulupe neefiye papuko.

“Ohandi ningi eenghendabala nokupopya novanhu tava longifa papuko oshimaliwa shovakulupe. Onghee ngeenge omunhu ina hala okulundulula ohandi shivifile ombelewa youministeli woukashikekookanhu nonghalonawa yokaana, opo i longe naye,” ta ti.

Okwa ti ovakulupe vamwe otava dengwa koluhepo nondjala molwaashi ihava lande oikulya ya wana.

“Ounona veefiye kave na eenghaku noikutu shaashi ovatekuli vavo otava longifa ashike oshimaliwa shounona momalodu,” kansela ta ti. Kansela woshikandjohoololo shEengodi Protasius Neshuku naye okwa hokolola ta ti oshikandjohoololo shaye nasho oshi na ovakulupe ve na oshimaliwa shavo tashi longifwa papuko. “Ovanhu vamwe hava kwatele ovakulupe opendjela ihava di nokulupe, onghee omunhu iha mono kutya omukulupe okwa pumbwa shike molwaashi ihava di navo,” ta ti.

Okwa indila ovanambelewa vouministeli woukashikekookanhu opo va kale tava ningile ovakulupe omapekapeko ngeenge oshimaliwa shavo otashi longifwa tuu okulanda oipumbiwa yavo.

fhamalwa@nepc.com.na