OSHAKATI-Opolisi moshitopolwa shaShana oya ti oyina oondholongo ondhuundha, oshoka omahala omashona.

Omupevikuluntu gwopolisi mOshana Deputy Commissioner Nico Steenkamp okwa ti, oondholongo odhina aantu ya pitilila naantu ya thika po300.

 “Omwaalu oguli pombanda oshoka aantu yamwe oya pewa oomboloha, ihe kaye na iimaliwa yokwiifutila mo mondholongo,” ta fatulula ngaaka.

Steenkamp okwali ta popi ngaaka esiku kwali aapanguli oshowo omweeti gwiihokolola yepangelo ya li ta thaneke andola ya talela ondholongo mOshakati.

Etalelo po ndyoka olyaka huulila ashike moonkundathana, ihe inaya gandja omatompelo kutya oshike inaaya thika we meni lyondjeendhililo.

Omugandji gwomauyelele gwopolisili moshitopolwa shaShana Thomas Aiyambo okwa ti aantu mboka yeli mondjendililo oomboka ye na iipotha inene, oshowo mboka yena ipotha oyindji.

Ta ti, ondholongo yOshakati oyina aantu yeli 237 ashike oyuuthwa yi kale ashike yina aantu yethike 130, ngaaka oya pitilila naantu yeli 107. Ondangwa yina aantu yeli 258 yo oyuuthwa yi kale aantu yeli ashike 130, Ongwediva oyina aantu 95, pehala lyaantu 23.

Ta gwedha po kutya mboka yeli mOshakati aalumentu ashike, aakiintu ohaya falwa kOndangwa nokOngwediva.

Okwa ti, aantu mboka yena iipotha iishona ohaya pewa omboloha oshoka kapena ehala lya gwana okuya endhilila.

Omulumentu gumwe opo a zi mondholongo ngoka edhina lye inaahala lyi tumbulwe okwa ti, oyendji yeli mondholongo oya tindilwa oomboloha, ihe uupyakandhi ohau zi kaakonakoni.

“Aakonakoni otaya pula oombumbo, ngele oya futwa oshimaliwa sho ntumba, ohaya gandjitha omboloha mbala,’’ ta popi ngaaka.

Ta ti, ngele oya hala oondholongo dhi udhuluke naya gandje oomboloha kaantu yena iipotha iishona.

Ta gwedha po kutya, aantu ayehe yeli mondholongo inaya yona, yamwe oya lundilwa. -vkaapanda@nepc.com.na