Ngoloneya gwoshitopolwa shaShana Elia Irimari okwa ti, oosikola dhimwe moshitopolwa moka inadhi vula okumana okutunga uundjugo, okuwopaleka omahala gaalongwa okwikeelela komuthi gwoCovid-19, omanga dhimwe dhili pokumana.
Oshitopolwa shaShana oshapewa oomiliona 64 kepangelo, oku opaleka omahala nomidhingoloko dhaalongwa oshowo okwikeelela komukithi gwoCovid-19.
Irimari dhoka okwedhi  popi sho ali atalelepo oosikola dhimwe, dha tothwamo kaadhina uundjugo tawu vulu okulongithwa kaanasikola moka mwakwatelwa  Eendjati, Onamutai oshowo Oshikoondiilongo.

“Osikola Eendjati  oyahulila muunyengwi okutunga okandjugo okape, oshoka mpoka pwathewa elambo lyokandjugo, opena omeya ga zi  kohi yevi, naatungi oyategelela omeya gapwiinine opo ya tsikile okutunga,”Irimari ta ti ngaaka.
Okandjugo hoka takakala kena omala gatano, okatengenekwa katungwe kongushu N$ 40 000.
Onamutayi oyi li metifa okutunga omuhandjo gwaamati yeli mongundu 12, omanga gwaakadhona kwapwa nale okulongwa.
Uundjugo wamati, owatamekwa okutungwa, omanga waakadhona wapwa nale okutungwa.
Aanasikola posikola mpoka oyalombwele Kundana kutya, oyanyanyukwa komuhandjo yatungulwa, nonande otaya nyenyeta olusheno kaalupo.
“Ohatu longitha osola ndjoka hayi tema ashike omutenya. Ohatu kala twahala okulesha uusiku oshoka ethimbo ndyoka ohakukala kwamwena nawa,” Aalongwa ya popi ngaaka. Posikola mpoka natango opwatungwa omagumbo gaalongi gomamboolota gopokathimbo, gena omala geli gatano.
Öshikoondiilongo moosikola adhihe dhatalelwapo kuNgoloneya, oyo yimwe -yili pokumana okutunga okandjugo, komala gatana hoka nako kalongitha iimaliwa yithike N$ 40 000.

“Okandjugo okeli pokupwa shili, ihe inandi nyanyukilwa nkene katungwa, omuntu eli meni lyokandjugo inapumbwa okumonika, kutya ota zi mokandjugo, opwa pumbwa okutungwa okakuma kasiikila omwelo,” Irimari ta ti ngaaka.
Ngoloneya okwakumagidha aatungi yalongithe oopulana tadhi yanda okutunga natango monakuyuwa.
Ta ti ngele tadhitungu nadhithaneka uule wethimbo okandjugo takalongithwa, okukwatelapo oshimaliwa shepangelo monakuyiwa.
Agwedhapo ta ti, natango shoka otashi kapula ishewe epangelo lyigandje oshimaliwa shokutungulula monakuyiwa.