Opolifi moshitukulwa Erongo otai indile moshiwana kwaau e na ouyelele medipawo lomukulupe weedula 80.

Otaku hokololwa Lupfer Axel, omundowishi a dile koshilongo Germany, a xulifa konima eshi a dengwa fiyo omefyo kookalyamupombo pokati kEtine nEtitano oshivike sha dja ko, efimbo loufiku meumbo laye li li moVineta modoolopa yaSwakopmund.

Omupopiliko wopolifi moshitukulwa Erongo Ileni Shapumba okwa hokolola kutya Axel okwa ponokelwa kookalyamupombo efimbo loufiku manga e li meumbo oye auke.

Okwa ti ookalyamupombo ova ya meumbo lomukulupe ndele tave mu denge fiyo omefyo, omo ta ku hokololwa kutya okwa hangika e na olutu la dinda.

Efimbo longula Olomakaya ookaume vomukulupe ova kala tava kendambala okudenga ongodi yaye, ashike oya kala ya dima okudja Etine.

Naashi osha kala sha limbilika ookaume kaye kutya Axel oku li peni mbela, onghee ookaume kaye ova ya keumbo laye efimbo lokomatango potundi 18h00.

Shapumba okwa ti eshi ookaume kaye va fika ova hanga omukulupe a nangala pedu monduda yaye e li popepi nombete a xulifa.

Opolifi oya ti Axel okwa hangika a mangwa komaulu nokeenyala neemwiya denghaku, vati okwa hangika yoo vali a mangwa kokanya noshilapi noshikutu.

Okudja opo ookaume kaye ova shiivifila opolifi mendelelo, nokonima eshi opolifi ya fika oya didilika kutya meumbo lomukulupe omwa vakwa omaliko oinima ngaashi okakefa koimaliwa, oTV, nefano lokufaneka nosho tuu oinima ikwao ya yooloka.

Shapumba okwa ti notuwa yomukulupe oya vakwa po efiku olo kookalyamupombo.

Otuwa itiliana Chevrolet yoludi lokatuukala, i na onomola N 3785 S.

Eshi opolifi ya ninga omapekapeko oya mona kutya ovafekelwa ova pita momakende eumbo ndele tava i meni.

Opolifi otai indile kukeshe ou e na ouyelele nakwatafane naDeputy Commissioner Eratus Iikuyu 0812464757 ile oshiwana shi kale sha lopotela opolifi keshe i li popepi.

Omudimba waAxel owa twalwa kokila yoshipangelo shaSwakopmund opo u ka ningilwe omakonaakono, novakwapata vaye shiivifilwa efyo laye.

Opolifi oya ti omakonakono otaa twikile.

– fhamalwa@nepc.com.na