New Era Newspaper

Icon Collap
...
Home / Opolisi molukongo lwaakwati koonkondo 

Opolisi molukongo lwaakwati koonkondo 

2021-02-24  Victoria Kaapanda

Opolisi molukongo lwaakwati koonkondo 
Top of a Page

Opolisi otayi kumagidha oshigwana shi kale sha kotokela ookalyamupombo ethimbo alihe, nokuyanda okwi iyendela oshowo okwi ikalela momagumbo, omolwaafuthi mboka taya longitha omikalo noompito adhihe okuyuga aantu iinima yawo.
Opolisi oya popi ngaaka konima yomukulukadhi gwomimvo 51 ngoka a kwatwa koonkondo omanga inaa yugwa iimaliwa ye uusiku wEtitano lya zi ko.

Sha ikolelela kepeko lyopolisi, oshiningwanima shoka osha holoka potundi 20h00 yuusiku momukunda Onelago B mOngwediva.
Otaku hokololwa kutya omukulukadhi ngoka, sho  ta egulula omweelo gwohofa, okwa li a dhimbulula oompadhi dha lyata nokudhingoloka egumbo lye.

Ta yi ti, pethimbo kwa li ta taalatala pevi, okwa li a ponekelwa kaafuthi ye li yatatu taye mu pula iimaliwa , omanga gumwe e mu ulika ombele pothingo.

Otaku hokololwa kutya omulumentu ngoka a li e na ombele okwa li a kwata omukukadhi koonkondo, omanga yakwawo yaali taya hadhagula egumbo, e taya kutha mo N$140 ya li mohauto.
Opolisi oya ti, nakukwata koonkondo okwa li a tsikile ta pula omukulukadhi, ya pewe N$200 kehe gumwe sho a mana iilonga ye. Opolisi moshitopolwa shaShana otayi indile moshigwana ngoka e na uuyelele kombinga yoshiningwanima shoka a lopotele opolisi kehe yi li popepi naye.

Shoka osha ningwa ashike omasiku gaali ga piti po sho okanona komimvo 11 ka kwatwa koonkondo komeho gayina naamwayina koMariental.
Sha ikolelela kepeko lyopolisi oshiningwanima shoka osha holoka koongulasha dhOsoondaha.
Otaku hokololwa kutya omulumentu ngoka okwa li a teya ekumba lyombashu, e ta piti inaa uvika.

Ta yi ti, okanona  sho ka ka papudhuka oka kuga, omulumentu ngoka okwa li a matukapo, nokonima okwa ka mangwa.
Oshiningwanima sha faathana oshomunamimvo 27, ngoka a kwatwa koonkondo komulumentu ngoka a li homata ondjembo sho a itiyele mombashu moka.

Sha ikolelella kepeko lyopolisi omukiintu ngoka okwa li nakuume ke gwomukadhona, molukanda Wanahenda mOvenduka.
Otaku hokololwa kutya oshiningwanima shoka osha holoka lwopotundi 01h00 yuusiku, sho omulumentu ngoka a li a tete po eelyenge lyondunda, sho a yi meni.  
Omukiintu ngoka a li alala namukwawo, anuwa okwa li a mono ompito yokutondoka po. Opolisi oyi li molukongo lwomulumentu ngoka.


2021-02-24  Victoria Kaapanda

Share on social media
Bottom of a page