Opolisi yaNamibia onkene tayi tsikile okupula oshigwana shi longele kumwe nayo okumanga omulumentu ngoka ta fekelwa oye omutse wuulunga woshimaliwa shoomiliona N$2 sha yakwa moBank Windhoek. 

Ombaanga yaBank Windhoek nayo oya tula po oshimaliwa shi thike poN$20 000 tashi ka pewa ngoka taka gandja uuyelele tau vulu okumangitha Nico Hijendepi Rebebe.

Omupevikuluntu gwopolisi Eino Nambashu okwa ti, nonando Rebebe ke na mpoka ta dhumwa natango, okwa kwatwa aantu yahamano, mboka ya li ya mangwa koRundu sho kwa li taya kambadhala okunana oshimaliwa.

Otaku hokololwa kutya aantu mboka okwa li ya mangwa kopolisi oshowo kaakonakoni yombaanga.

 Omufekelwa gotango anuwa okwa li a mangwa sho anuwa a li ta kambadhala okunana oshimaliwa meni lyombaanga, koRundu. 

Otaku hokololwa kutya aafekelwa okwa li ya tuminwa iimaliwa, yamwe oN$200 000 omanga yamwe ya tuminwa oN$500 000.

Momushangwa gwa pitithwa, Nambahu okwa ti, aafekelwa yaali natango haya zi koRundu, oya yi ontuku, mboka nayo taya kongwa kopolisi.

Otaku hokololwa kutya aakalimo yokoRundu mboka oya li ya uvanekelwa iilonga kuRebebe yokoofaalama, noya li ya lombwelwa ya patulule omayalulombaanga noBank Windhoek.

Opolisi natango oya ti, aafekelwa yaali oya holoka mompangu kOpuwo, Etitatu, sho taya tamanekelwa eyako lyoshimaliwa osho tuu shoka, noshipotha shawo osha undulilwa momasiku 11 Apilili nuumvo.

Omadhina gawo oyo, Untag Kamati (34) oshowo Fenni Megameno Ankoshi (19). 

Opolisi otayi indile kukehe ngoka e na uuyelele kombinga yoshiningwanima shika a kwatathane naJoseph Mafwila goBank Windhoek konomola 081 122 2091 nenge opolisi yi li popepi.

Otaku hokololwa Rebebe a li a tumu oshimaliwa sha thika poomilliona N$2 mehuliloshiwike lya zi ko, sho a li a tula oshimaliwa koombaanga dhopaumweno okuza mombanga yoBank Windhoek mOpuwo hoka a li ha longo. vkaapanda@nepc.com.na