New Era Newspaper

New Era Epaper
Icon Collap
...
Home / Oshilyo sho-NDF miipandeko eshi sha twa okaNangula nOkapi

Oshilyo sho-NDF miipandeko eshi sha twa okaNangula nOkapi

2021-09-23  Festus Hamalwa

Oshilyo sho-NDF miipandeko eshi sha twa okaNangula nOkapi
Top of a Page

Omukainhu weedula 24 okwa mona oshiponga eshi a tuwa nombele yokapi kohonda yaye mEtivali efimbo lokonguloshi poundingosho polukanda Epaya modoolopa yaShikuku.

Nakutuwa nombele oye Frieda Hilooloka omukalimo womomukunda Iiputu.

Omukulunhu wopolifi moshitukulwa shaMusati Commissioner Titus Shikongo okwa hokolola ta ti nakutuwa nombele okwa kala e li mohole efimbo lile nomukulupe ou taku hokololwa kutya ohonda yaye.

Shikongo okwa ti pefimbo kwa li ve li koundingosho nohonda yaye ova ka tameke tava tanguna, nokonima omufekelwa okwa kufa ombele yokapi moshiya ndele ta tu ohonda yaye loikando ivali. Opolifi oya ti Hilooloka okwa tuwa tete mombuda, ndele ta tuwa vali medimo, nokonima omufekelwa okwa teta omunwe wokolumusho waHilooloka ou kwa li wa djala olinga.

Shikongo okwa ti Hilooloka okwa mona oshiponga neenghono shaashi okwa li a tuwa unene a ninga eembululu mombuda nomedimo.

Okwa twalwa koshipangelo shaShikuku tete nokonima okwa ka tuminwa koshipangelo sha kula shaShakati opo a ka mone epango lopaunamiti, omo ta hokololwa kutya oku li monghalo idjuu.

Omufekelwa omulumenhu weedula 57, omukalimo wokomukunda Okaku, moshitukulwa shaShana. Nonande kwa li a lya onghaku, omufekelwa ou okwa mangwa po onghela mOshikuku nokwa patululilwa oshibofa nota holoka momhangulilo yaMangestrata yaShakati nena (mEtine).

Shikongo okwa londwela ovakainhu opo va kale tava lopotele opolifi ngeenge tava ningilwa omahepeko momaumbo ile tava ningilwa omatilifo keehonda davo. – fhamalwa@nepc.com.na


2021-09-23  Festus Hamalwa

Share on social media
Bottom of a page