New Era Newspaper

MTC Shares
Icon Collap
...
Home / Oshiwana shovayelele kashi na omaufemba oshilongo

Oshiwana shovayelele kashi na omaufemba oshilongo

2021-09-15  Festus Hamalwa

Oshiwana shovayelele kashi na omaufemba oshilongo
Top of a Page

Kansela woshikandjohoololo shaTamanzi Johannes Iiyambo ota hokolola ta ti oshiwana shovayelele shi li moshikandjohoololo shaye kashi na sha omaufemba woshilongo.

Okwa ti eshi oshi li eshongo linene kovakulunhu nounona shaashi kave na sha omaufemba, vo ihava mono oshimaliwa shokulikwafela.

Meenghundafana a ninga naKundana Etivali kansela Iiyambo okwa popya ta ti oshikandjohoololo shaye osho shimwe shi na oshiwana shovayelele shihapu shihe na omaufemba oshilongo.

Kansela okwa ti omikunda ngaashi Okakewa, Amarika, Onkaankaa, Onkani, Ondjungulume, Okalondo nOnanyalala odo dimwe di na oshiwana shovayelele shihe na omaufemba.

Iiyambo okwa ti ombelewa yaye oya kala nokuninga eenghendabala dokukwafela oshiwana shovayelele opo shi dule okukala sha mona omaufemba ashike okwa xulila mounyengwi. Okwa popya ta ti ovakulunhu vahapu vovayelele kave na sha omaufemba, naashi osha eta opo ounona wavo va kale kave na omaufemba.

Okwa ti ounona vovayelele ihava mono omauwa okudilila kepangelo ngaashi oshimaliwa eshi hashi pewa ounona moshilongo, shaashi kave na sha omaufemba.

Onghee okwa popya ta ti eshi oshi li eshongo linene lataalelwa koshiwana shovayelele shaashi ihashi dulu okukonga oilonga ile okuya keefikola.

“Ohandi indile ouministeli woikwameni neameno lokeengaba, nouministeli woukashikekookanhu opo u kale wa talela po omikunda edi di na oshiwana shovayelele shihe na omaufemba. Eeministeli edi mbali oda pumbwa okukala da yandja tete omaufemba kovadali vounona vovayelele, nokonima ounona navo otava dulu okukala va pewa omaufemba opo va dule okukala tava pewa oshimaliwa okudilila kepangelo,” Iiyambo ta ti.

Iiyambo okwa popya ta ti ounona vovayelele vamwe ihava i kofikola shaashi otava dengwa konghalo yoluhepo nondjala, naashi osha eta opo ounona va kale vatwa ofikola okati.

Kansela okwa weda po ta ti omikunda dimwe domoshikandjohoololo shaye otadi dengwa kenota shaashi ovanhu ohava nu omeva a lula a dja meendungu.

Okwa denga omufindo ta ti ombelewa yaye otai twikile nokuyandja omayakulo koshiwana nokukala ya kwashipaleka kutya oshiwana shi li momhumbwe osha pewa omakwafo.

fhamalwa@nepc.com.na


2021-09-15  Festus Hamalwa

Share on social media
Bottom of a page