Opolisi moshitopolwa shaShana oyi li molukongo lwaafuthi mboka, ya ponekele ositola yomatayiyela tayi ithanwa Trend tyre mOshakati, nokuyugamo soshimaliwa shithike poN$15 000 koomuma.

Omugandji gwomawuyelele moshitopolwa shaShana Thomas Aiyambo okwa ti oshiningwanima osha holoka komatango gOmandaha goshiwike shika, potundi 19h00 molukanada Oneshila.

“Otaku hokololwa kutya omulumentu gwomimvo 31, ngoka aniwa oye omuniilonga omukuluntu mositola, okwa li a ponokelwa koombudhi  ethimbo kwa li ta pata ositola a ye kegumbo.  Okwa li a undulilwa noku dhengwa nomweelo gwoshitenda moshipala aniwa agandje ooshapi dho shiketha shiimaliwa,” Aiyambo ta ti ngaaka.

Nonande a li ta kondjo nayo, nelalakano okuyasinda okwa li a tentekwa ombele pothingo kaafuthi ye li yaali, taye mu kondjitha a gandje oshapi ye a ka ulike mpoka pe na oshiketha shiimaliwa.
Aiyambo ota ti aalumentu mboka okwa li yakutha mo oshimaliwa shi vule N$15 000, e taya fadhuka po. Sigo onena kape na ngoka a mangwa, ashike omulumentu ngoka okwa li a kwashilipaleke opolisi kutya ngele aafuthi mboka okwe ya mono kiipala oteya dhimbulula.
Opolisi natango oyi li molukongo lwaafuthi mboka ya teya obar yedhina Nekundi,  mboka ya li ya yaka mo iinima oyindji, yongushu yi vule N$90 000 pomukunda Opoto moshitopolwa shaNgwediva.

Otaku hokololwa kutya oshiningwanima shoka osha ningwa potundi inayi shiwika.  Mokati kiinima ya yakwa omwa kwatelwa omashina go jackpot.
“Aafuthi mboka inaa ya shuwike kutya oya li yangapi nethimbo ya li ya ponekele ehala, okwa li ya teya po ekumba lyomwelo opo ya pite,” Aiyambo apopi ngaaka.
Aiyambo okwa ti, oshigwana nashi longele kumwe nopolisi uuna yamono omayinyengo ga puka pomawushinda gawo, naya lopotele opolisi mehendelelo.

Ta gwedhapo ta ti iimbuluma oya shuna pevi  noonkondo moshitopolwa shaShana. Ihaya lopotelwa we iiponga unene mbyoka kwa li unene hayi holokele pomahala gomaninwo.
“Onda koleke kutya nani omalovu ogo ge na uupyakadhi, oshoka ethimbo kwa li oomahala gwomaninwo ga patuluka kehe ethimbo oositasi dhopolosi odha kalelwa kaantu taya lopota imbuluma niiponga,” Aiyambo ta ti ngaaka.
Ta ti ngashi ngeyi oshiwike ohashi piti po inaya lopotelwa sha oshiwinayi moshitopolwa shaShana nonando aafuthi oyo ayeke taya yugu inima yantu, ashike, hangashi shito.