Victoria Kaapanda 

ONGWEDIVA-Aakalimo yomiitopolwa oyindji yomonooli ya tameke okutula etemo miilonga sho oshilongo tasho mono omvula ombwaanawa.

Okuza owala pokati kaDeseba aalongi yomapya oyendji oya kala miilonga, nokupulula, okulima noshowo kuna omapya gawo.

Kundana sho ali ayi moonkundathana naanafalama yamwe mboka ali a adha taya longo momapya gawo momukunda Okaandje moshikandjohogololo shaNgwediva, oya ti inaya hala no itaya hepitha nando ethimbo lyokulonga oshoka omvula ihayi tegelele omuntu. Onkene otaya longitha ompito kehe taya mono.
Lydia Haiyambo okwa ti oya pulula epya lyawo omasiku omashona konima yoKrismas. Esiku ndoka olyo kwali ya tameke nokumana okukuna, ihe iilya yawo oya mena nawa nale.

Omunafalama ngoka okwa popi kutya iilya yawo oya koko pethimbo ewanawa. Ta ti omagumbo gamwe ogali gena omawupyakadhi gokupulula omvula sho yaloko tango, oshoka omapya gawo ogali ga yula komvula ndjoka yali onene.

Hilma Ndahambelela Shalumbu gwomomukunda Okandje okwati oku uvite nawa, omvula sho tayiloko nawa, ta ti inahala nando yishune manga iilya yawo inayi koka.

“Omvula ndjika tayi loko omasiku ngaka oyo omvula yokumenitha iilya. Ngaashi tayi pititha po esiku limwe opo iilya yimone oonte dhetango osho nana shili mondjila yo tayi tsikile natango esiku lya landula,” Shalumbu ta ti ngaaka.

Ta hokolola ta ti nuumvo okuna omukumo kutya oyendji oyena okulonga iilya, kakuna nando ondjala. Aanafalama naya longe ashike ya itulamo opo ya vule okumona iilya yagwana okupungula miiyanda yawo oshoka kushi kutya oshike shili komeho gomuloka omwanawa.

Shalumbu tati omwenyo gwe ogu uvite ombili sho gwa tala iilya yakoka sigo oompoka. Sho osho shemukalitha mepya sigo ethimbo ndoka nonande owili yoku zimbuka mepya oyathoka nale.
Ta ti omvula ya za ko omapya pethimbo ndika hasho gali taga monika ngaaka, oshoka omvula kayaliko nawa, ta ti onkene omvula ndjika okuna okulonga a itulamo. 

Ta imemeha tati okwa hala ashike ngeno okwe yi tula nale mokayanda, yo inaya vala natango oshoka okwa lululwa kondjala.

Ta ti omagumbo gamwe inagamona ompito yokupulula momukunda gwawo natango, oshoka yamwe kayali yena oshimaliwa shokupulula, yo kayena aayambidhidhi niimaliwa oya pwapo kokulanda iilya yomvula ya zi ko.

Omapya gamwe opo taga tameke okupululwa oku za nena, oshoka aakulupe opo ya kwata openzela yawo ohela.

Natalia Makanya okwati otaya pulula metitano ashike oyena uutile womvula ndjoka tayi loko shinene pamwe otayi fuvulamo iilya yawo yi kale inayi koka.

“Ondahala manga omula yi mwenepo omasiku nande gatatu, opo yipe mboka inaya pulula natango ompito yokupulula nokukuna, oshoka ya kwetu yamwe oya mana nale otaya helele ashike,” Makanya apopi ngaaka.

Nonande yamwe yahala oomvula yimwenepo omasiku omashona opo yamone ompito yokulonga omapya gawo, oyendji mboka ya tameka okulonga kuyele oyanyanyukilwa omuloka omwanawa.